Русија разговараше со американскиот државен секретар Марко Рубио за отстранување на заканите кон Русија кои произлегуваат од обидите Украина да се вклучи во НАТО, рече рускиот министер за надворешни работи Сергеј Лавров, во денешното обраќање во руската Дума.
– Треба да ги отстраниме сите закани за Русија кои беа создадени со обидите да се вовлече Украина во НАТО – рече Лавров.
Тој истакна дека „акциите на киевскиот режим мора да бидат запрени“.
– Целта им е да уништат сè што има врска со Русија – додаде рускиот министер.
Лавров нагласи дека задачите поставени од рускиот претседател Владимир Путин се „задачи од големо значење“.
Неговите коментари доаѓаат по вчерашната средба помеѓу американски и руски претставници во Саудиска Арабија, на која се дискутираше за ситуацијата во Украина, а на која учествуваше и тој.
Лавров нагласи дека „искоренувањето на основните причини за украинската криза нема алтернатива“. Додаде дека тоа го потенцирал и Путин за време на неговиот телефонски разговор со американскиот претседател Доналд Трамп на 12 февруари.
Осврнувајќи се на разговорите во Саудиска Арабија, Лавров рече дека „посветивме особено внимание на оваа тема“.
– Пред сè, ова е за отстранување на заканите за безбедноста на Русија кои се создаваа многу години со вовлекување на Украина во НАТО – повтори тој.
Во врска со руската надворешна политика, Лавров изјави дека Русија продолжува да гради мултиполарен свет во кој сè повеќе земји ја отфрлаат „надворешната диктатура“ и формираат нови сојузи, како што е БРИКС – групацијата составена од Бразил, Русија, Индија, Кина и Јужна Африка.
– Имаме воспоставено партнерство со Иран и стратешка соработка со Кина. Односите меѓу Москва и Пекинг никогаш не биле посилни – рече Лавров.
Тој додаде дека Русија има силни врски со Белорусија и дека Кремљ ќе продолжи да ги продлабочува овие односи.
