Специјалното обвинителство на Косово подигна обвинение против Албанец од Косово, Х. С., за кривично дело „шпионажа“, односно под сомнение дека соработувал со Безбедносната и информативна агенција (БИА) на Србија од ноември 2009 година до неговото апсење во мај оваа година, објави Косев.
Според обвинението, Х. С. е обвинет дека патувал во Сирија на 22 ноември 2015 година, каде што се приклучил на терористичката организација ИСИС.
Таму, тврдат тие, тој им испраќал на службениците на БИА информации за бројот на Албанци кои учествуваат во ИСИС, нивната организација и деловите од Сирија во кои тие дејствуваат.
„По враќањето во Косово и издржувањето затворска казна за учество во терористички организации, тој продолжил да се среќава во Србија со службеници на БИА, поточно со директорот за борба против тероризмот, И. Б., и давал други важни информации“, изјави Обвинителството.
Според обвинението, како награда за овие информации, службениците на БИА му плаќале на Х. С. до 700 евра месечно.
Косев наведува дека ова е едно од вкупно шест апсења во Косово по обвинение за шпионажа за БИА.
