Колку чини слободата кога си син на партиски функционер?

Неверојатна приказна од земјата со “независни институции”. Асмир Јахоски, син на ДУИ-партиецот Исмаил Јахоски и сопственик на Пуцко Петрол, по само неколку денови во притвор, откри колку точно чини слободата во “правна држава” – скромни 2,15 милиони евра!
Додека обичните граѓани за далеку помали престапи можат да гнијат со години во притвор, нашите “елитни осомничени” си имаат сопствен ценовник. Обвинителството за гонење на организиран криминал и корупција наеднаш стана великодушно и се “согласува” да се укине притворот на човекот осомничен за перење пари во мега-аферата со набавките на мазут за ЕСМ и ТЕЦ Неготино.
Интересно како обвинителството прецизно ја пресмета сумата на “противправно стекнатата имотна корист” – точно 72 милиони денари. Не 71, не 73 – туку прецизно 72. Сигурно е случајност што оваа сума се вклопува во понудената гаранција?
Кога обвинителството вели дека “значително е намален ризикот дека тој би можел да ги сокрие, фалсификува или уништи трагите”, тоа всушност значи: “Собравме што можевме, остатокот го пуштаме на слобода за да може на мир да си ги среди работите”.
И додека екс-директорот на ЕСМ Васко Ковачевски е во бегство, младиот Јахоски наскоро ќе може да ужива во домашен притвор. Со мерки на претпазливост, се разбира – ќе мора да се јавува во полициска станица повремено, што сигурно ќе биде страшна мака за човек кој манипулирал со милиони евра.
Афера од 160 милиони евра, а главните осомничени или се во бегство или набрзо ќе бидат дома. Правда по македонски – имаш пари за гаранција, имаш слобода. Немаш? Е тогаш си виновен.
Јавноста нетрпеливо очекува во кое елитно кафуле наскоро ќе може да го види Јахоски како мирно испива утринско кафе додека уште седум осомничени за истиот криминал се прашуваат дали и тие имаат доволно “тежок” татко за да си ја обезбедат оваа привилегија.