Кина стана прва во светот која трансплантира модифициран свински црн дроб на човек Кинески лекари за првпат во светот трансплантирале свински црн дроб на човек примател, објавија научниците од Воено-медицинскиот универзитет во Ксиан, северозападна Кина.
Искористениот црн дроб бил од минијатурна свиња која била генетски модифицирана за да се намали ризикот од отфрлање на органите.
Откако бил трансплантиран на лице без когнитивна функција (мозочно мртов пациент), црниот дроб успешно произведувал жолчка и одржувал стабилен проток на крв.
Потоа, научниците ја следеа способноста на црниот дроб да ги извршува основните функции, протокот на крв и неговиот имунолошки и воспалителен одговор во следните десет дена.
Истражувачите се надеваат дека овој орган во иднина би можел да се користи како потенцијална терапија за пациенти со откажување на црниот дроб кои чекаат органи од човечки донор.
“Црниот дроб што го зедовме од генетски модифицираната свиња функционираше многу добро во човечкото тело. Ова е големо достигнување. Оваа операција беше навистина успешна”, вели професорот Лин Ванг, автор на студијата, чии резултати се објавени во списанието Nature.
„Го следевме протокот на крв во различни вени и артерии. Сè функционираше многу добро“, рече Ванг.
Експериментот беше прекинат по десет дена, на барање на членовите на семејството на пациентот.
За да се подобри компатибилноста со човечки црн дроб за целите на трансплантација, научниците модифицираа шест гени. Наодите сугерираат дека таков модифициран црн дроб може да функционира во човечкото тело, но потребни се дополнителни истражувања за долгорочни резултати, се вели во студијата.
Ванг изрази желба во иднина да се спроведат слични истражувања на луѓе кои не се мозочно мртви, но предупреди на бројните компликации и „строгите правила“ што ги носат таквите операции.
Рафаел Матесан, основач на шпанската национална организација за трансплантација, изјави дека „ова е прв случај на трансплантација на генетски модифициран свински црн дроб во тело на мозочно мртво лице во светот“.
„Крајната цел на експериментот не беше да се изврши стандардна, рутинска трансплантација на црн дроб, туку да се покаже како свинскиот црн дроб може да се користи како привремен „орган за мост“ во случаи на акутна црнодробна инсуфициенција – додека се чека човечки орган за конечна трансплантација“, рече тој.
Трансплантацијата на црн дроб е најефективниот начин за лекување на заболување на црниот дроб во краен стадиум, но побарувачката за донаторски органи далеку ја надминува понудата.
Свињите се сметаат за најдобар алтернативен извор на органи поради нивната физиолошка функционалност и големина, која е слична на онаа на луѓето.
