Адвокатот Игор Ефремов го испрашуваше неговиот клиент, обвинетиот Влатко Кешишев, за убиствата на Вања Ѓорчевска и на Панче Жежовски што се случија во номеври 2023 година.
Кешишев рече дека се познава со сите обвинети, освен со таткото Александар Ѓорчевски, за кого рече дека првпат го видел во судница. Палчо го запознал на протест во Скопје, а подобро се запознале во Опера хаус. Таму ги запознал и Велибор Манев и Боре Видевски.
Кешишев од октомври 2021 година почнал да работам во партијата Трета, во седиштето во Опера Хаус. Тогаш се вратил во Македонија од странство.
– Требаше таму да готвам. Имаше школо од карши, ставиме шанк и од таму во школото испорачувавме пици и сендвичи. Се очекуваше локдаун, но немаше локдаун и јас останав таму, да готвам за Палчо и за некои гости ако дојдат – рече Кешишев.
– Кои ви беа обврските во партијата и кој ви ги даваше? – праша адвокатот Игор Ефремов.
– Да готвам и да ги дочекувам посетителите со кафе и со вода кои доаѓаат да даваат потписи и поддршка на движењето. Само што се вратив од Хрватска, после 10 дена отидов во Опера хаус. Не примав плата, и не се жалам, оти тоа беше акција за да се формира партијата – рече Кешишев.
Тој рече дека имал понуди за работа и на други места во Македонија, го викале и во Хрватска, оти имал оставено добар впечаток. Но, тој сакал да помогне за партијата и не отишол никаде да работи.
Адвокатот го праша дали ги познавал оштетените Панче Жежовски и Вања Ѓорчевска.
– Не. Ги видов на Фејсбук, дотогаш ги немав видено. Панче го видов на Фејсбук, а и детето го видов откако сѐ се заврши. Кога се вратив во партијата отворив Фејсбук и видов дека детето се бара – рече Кешишев.
– Дали имаш учествувано во копање дупка во близина на Велес и кога? – праша адвокатот Ефремов.
– Да. Тоа беше во 2022 година, во една недела дојде Велибор во работно одело. Бевме само јас и Палчо, оти во недела навечер се спрема емисија. Тогаш Палчо ми кажа да отидам да му помогнам на Вељо, а не ми објаснија што е работата. Само ми кажа да помогнам. Јас го послушав и отидовме со „мерцедесот“ на Вељо до тоа место Рудник, по црниот пат, од кај Катланово. Кога стигнавме таму Вељо извади копачи и лопата и тргнав со него. Влеговме во грмушки, затскриено место и таму Вељо обележа еден круг и почна да копа. Цело време ништо не зборувавме. Тој копаше, јас ја исфрлав земјата надвор. Во прво време помислив дека бараме злато, бидејќи не ми беше кажано ништо. Копавме до одредена далечина, се спакувавме и се вративме назад, без зборови. Тоа се случваше во недела, бидејќи Вељо тогаш е слободен. Пак со Вељо отидовме следната недела на истото место и продолживме да копаме. Пак молчевме, јас мислев дека се работи за злато. Копавме до одредена длабочина и се вративме назад во штабот. Не разговаравме ништо. Следниот пат кога отидовме, исто во недела, јас и Вељо влеговме подлабоко во дупката. Тогаш Вељо ми рече дека за ова не треба никој да знае, може и глави да летаат. Затоа што дупката била замислена за намена за киднапирање на лица. После се вративме во штабот и Велибор му кажа на Палчо до која длабочина сме дошле. Потоа ја довршивме дупката од четврти пат. Ја ископавме до замислената длабочина. Велибор стави капак со даски одозгора, да ја покрие. Се вративме назад во штабот и Велибор му кажа на Палевски дека сѐ е во ред и дека има доволно длабочина – објаси Кешишев.
– Дали ставивте нешто во дупката или стоеше празна? – праша Ефремов.
– Мислам дека Вељо беше направи анкер со алка – рече Кешишев.
– Колку време стоеше ископана дупката? – праша Ефремов.
– Од 2022 година до настанот со Панче – рече Кешишев.
Адвокатот го праша Кешишев дали присуствувал на разговори помеѓу сообвинетите на теми поврзани со партиски активности.
– Јас и Палчо бевме заедно цело време и слушав разговори на таа тема за грабнување. Ги слушав и мислев дека имаат сериозна намера. Долго време помина и ништо не се слушуваше. Јас го сфатив тоа како желба, како фантазија. Во 2023 година требаше пак да одам во Хрватска да работам. Бевме јас Палчо и уште еден член, му реков дека ме бараат да одам, тој ми рече дека не може, оти му требам. Бидејќи јас се грижев за него, а во Кисела Вода тој го донесе кучето, па се грижев и за неа. И така немаше адекватна замена за мене. Го послушав и продолжив да работам во штабот. Во тоа време собиравме декларации за црквата и имаше многу луѓе што доаѓаа и стари и млади – рече Кешишев.
– Кој беше инцијатор на разговори за тема грабнување и лолку често се одвиваа такви разговори? – праша адвокатот Ефремов.
– Не знам кој беше иницијатор, но тој момент во разговорите го почнуваше Вељо – рече Кешишев.
Тој рече дека знае каде живее Велибор Манев и дека има одено кај него дома.
– Со Палчо имам одено два или три пати. Првиот пат за централниот комитет во Велес, потоа на неговата слава, а последен пат за случката со Панче – рече Кешишев.
– Дали на 22.11.2023 година си бил кај Велибор Манев? – праша адвокатот.
– Не помнам дати. Таа вечер бев со Палчо, бевме во гаражата – рече Кешишев.
– На снимките од дворот на Манев се гледа дека доаѓате со „рено кангу“ и од совозачкото место вадите ранец. Може ли да го опишете ранецот, по боја и дизајн и што имаше во него? – побара адвокатот.
– Темно син, тегет. Не сум го отворал и не знам што има внатре. На Палчо беше и тој си го носеше, а јас не сум љубопитен да чепкам по туѓи работи. Палчо го носеше, го стави на совозачкото место кај нозете, каде што седев јас – рече Кешишев.
– Кој ви побара да го извадите ранецот од возилото? – праша Ефремов.
– Палчо. Претходно извадив и хартиена кеса и во неа се гледаа токи воки, мотороли – рече Кешишев.
– Каде ги однесовте ранецот и кесата со моторолите? – праша адвокатот.
– Во гаражата – рече Кешишев.
– Каде остана ранецот, дали го вративте во возилото? – праша адвокатот.
– Мислам дека го вративме – рече Кешишев.
– Кои бевте во дворот на Велибор? – праша Ефремов.
– Се гледа убаво. Палчо, Велибор, Боре и јас – рече Кешишев.
– Што разговаравте таа вечер? – праша адвокатот.
– Се разговараше за Панче, каде живее и како да се пријде до него – рече Кешишев.
– Колку време се задржавте кај Велибор? – праша адвокатот.
– Што знам, можеби половина час – рече Кешишев.
– Потоа што направивте? – праша адвокатот.
– Потоа тројцата зедоа токи воки и тргнаа кон куќата на Панче. Мене ме оставија да го земам „кангуто“ и да чекам долу на патот – рече Кешишев.
– Која беше целта во разговорите за грабнување на Панче? – праша адвокатот.
– Целта беше возило кое нема да го бараат, да се земе возилото – рече Кешишев.
Тој рече дека нему не му била дадена моторола за комуникација со останатите.
Откако се паркирал со „кангуто“ чекал околу половина час, 40 минути.
– Тие се вратија, разговараа дека ништо не бива. Палчо влезе во „кангуто“ и се вративме во штабот. Следниот пат отидовме наутро, јас и Палчо со „кангуто“. Палчо ме остави на црниот паркинг покрај пругата. Тој замина, како што било договорено, кај Панче – рече Кешишев.
– Цело време бев во „реното“. Ми кажаа да седам таму и да не излегувам. Да ги чекам да се вратат. Чекав околу еден саат. Се вратија тројцата со „цитроенот“, се спуштија и се паркираа покрај мене, покрај „кангото“. Таму запаливме по една цигара, а Палчо го фрли во долот телефонот на Панче, кај капините. Се договоривме да одиме. До мене седеше Вељо и ми го покажуваше патот кон езеро. Возевме, а пред „цитроенот“ беа Палчо и Боре. Вељо имаше токи-воки и комуницираше со Палчо. Му кажуваше дека патот е чист и дека нема опасност. Стигнавме до местото, се паркирав над пунктот за песок. Велибор влезе во „цитроенот“ и отидоа кон дупката. Јас останав да ги чекам, околу половина час. Кога се вратија Вељо седна пак до мене, ми рече каде да одиме, да влезам на стариот пат кон Катланово. По стариот пат одевме до првата населба Маџари. Палчо му јави на Вељо да се паркираме на еден поголем паркинг, а тој се паркираше позади нас. Излегоа од колата, Палчо ги избриша воланот и менувачот и кваката со WD–40. Во „кангуто“ до него седеше Вељо, а јас и Боре бевме позади и отидовме до штабот – рече Кешишев.
– На паркингот каде сте чекале во Велес, кога дојдоа со колата на Панче, дали вие го видовте Панче? – праша адвокатот.
– Не, бидејќи бил ставен во гепекот – рече Кешишев.
– Дали вие видовте дека е во гепекот или ви кажаа – праша адвокатот.
– Не. Од разговорите меѓу нив дознав дека и Панче е внатре, во гепекот – рече Кешишев.
Тој додаде дека на пат кон Скопје со Велибор за ништо не зборувале, а дека Манев одржувал контакт со Палевски преку моторолите.
– Дали прашавте каде е и што се случи со Панче? – праша адвокатот.
– Не. Кога стигнавме во штабот, тогаш дознав – рече Кешишев.
– Што дознавте во штабот? – праша адвокатот.
– Дека грабнатиот е убиен и е фрлен во дупката – рече Кешишев.
