Можностите за унапредување на процесот за создавање на Фондот за енергетска ефикасност како и негова операционализација во најкус можен рок, беше една од темите на дискусија на денешната средба на министерката за енергетика Сања Божиновска со претставници на Светската банка.
На состанокот се дискутираше за потенцијалните фондови од Светската банка, кои би биле наменети за поддршка на енергетските реформи, транзицијата кон обновливи извори на енергија и подобрување на енергетската ефикасност во земјата.
Од страна на Светска банка беа презентирани искуства од земјите во регионот.
-Фондот ќе има клучна улога во финансирањето и спроведувањето на проекти за енергетска ефикасност, придонесувајќи кон намалување на потрошувачката на енергија и заштита на животната средина – велат од Министерството за енергетика.
Како што соопштија од Министерството, се разговарало и за проектот за енергетска ефикасност во јавниот сектор-Public Sector Energy Efficiency Project (PSEEP) во компонента 3 кој е наменет за поддршка на оваа активност во Македонија.
На состанокот беа дискутирани и можностите за соработка во полето на енергетиката каде што Светска Банка може значително на придонесе за подобрување на целиот процес.
„Министерството останува посветено на имплементација на реформите во енергетиката и во таа насока продолжуваме со активна соработка со Светска банка се со цел пронаоѓање на решенија за подобрување на енергетскиот сектор“, се наведува во соопштението.
