Калас му се спротивстави на Трамп

НАТО ја дава најдобрата безбедносна гаранција за Украина, изјави високата претставничка на Европската унија за надворешна политика и безбедност, Каја Калас, директно спротивставувајќи се на позицијата на претседателот на САД, Доналд Трамп .

Калас во Вашингтон изјави дека Европејците нема да можат да придонесат за евентуален договор за Украина доколку не бидат поканети на преговарачка маса, додека, пак, Трамп директно ќе преговара со рускиот претседател Владимир Путин, пренесоа француските медиуми.

– НАТО чадорот е единственото нешто што навистина функционира, единствената безбедносна гаранција што функционира – изјави поранешната премиерка на Естонија која е во посета на Вашингтон.

- Advertisement -

Трамп отфрли каква било можност Украина да се приклучи на НАТО, на што Москва исто така се спротивставува, и беше нејасен за безбедносните гаранции што САД би биле подготвени да ѝ ги понудат на Украина во случај на прекин на огнот по тригодишна руска инвазија.

Трамп алудираше дека желбата на Украина да влезе во НАТО е „веројатно причината поради која започна целата работа“ – војната со Русија.

Калас оцени дека „тие обвинувања се целосно погрешни“ и дека тоа е „руска реторика во која не треба да веруваме“, прашувајќи „зошто на Русија да ѝ се даде тоа што го сака, повеќе од тоа што веќе го направи, а тоа е нападот на Украина, анексија и окупација на територијата“.