Јужнокорејската агенција за заштита на податоци во понеделникот соопшти дека новите преземања на кинеската апликација за вештачка интелигенција DeepSeek се суспендирани во земјата, откако компанијата призна дека целосно не ги почитувала правилата за заштита на личните податоци.
Според соопштението на Комисијата за заштита на личните податоци (PIPC), апликацијата ќе биде повторно достапна за корисниците само откако ќе се направат потребните подобрувања во согласност со националните закони за приватност.
Мерката, која стапи на сила во саботата, ги блокира новите преземања на апликацијата DeepSeek, но нејзината веб-верзија останува достапна за корисниците во Јужна Кореја.
PIPC изјави дека кинеската стартап компанија именувала правни претставници во Јужна Кореја минатата недела и официјално признала дека делумно ги игнорирале одредбите на законите за заштита на податоците во земјата.
Италијанската регулаторна агенција Garante, исто така, нареди DeepSeek да го блокира својот чет-бот во земјата минатиот месец поради неисполнување на барањата за политиката за приватност.
DeepSeek сè уште не ја коментираше оваа одлука.
На прашањето за потезите на јужнокорејските власти, портпаролот на кинеското Министерство за надворешни работи на 6 февруари рече дека Пекинг придава големо значење на заштитата на приватноста и безбедноста на податоците и дека сите компании во Кина работат во согласност со законот.
Тој исто така нагласи дека кинеската влада никогаш нема да бара од која било компанија или поединец да собира или складира податоци на начин што го прекршува законот, пренесува Ројтерс.
