Јовева вели дека македонскиот народ не треба да прифаќа лажни наративи

Вчерашното усвојување на извештајот во Европскиот парламент не значи дека е оспорен македонскиот јазик или идентитет, вели европратеничката од Словенија со македонско потекло, Ирена Јовева, во интервју за Канал 5, но и во своето обраќање во Брисел.

– Тоа не треба да се сфаќа така, зашто тие не можат да се земат ни со лобирање, ни со гласање – изјави Јовева, додавајќи дека ЕП нема и никогаш нема да си земе за право да одлучува за идентитет и јазик на било кој народ, па ни на македонскиот.

Таа потенцира дека не е точно дека надвладеало грчко-бугарското лоби, ниту дека амандманите биле прифатени со цел бришење на македонскиот идентитет.

- Advertisement -

– Ако навистина надвладееше тоа лоби, ќе поминеше и амандманот со фрази како „модерен јазик“, „модерен идентитет“. Тоа немаше шанси да помине – вели Јовева.

И покрај тоа што делот од текстот што го споменува идентитетот бил избришан, Јовева е категорична дека тоа не било поради политички притисоци, туку затоа што Европскиот парламент едноставно не се меша во теми за етничка и јазична припадност.

Во контекст на тоа каква порака се испраќа до граѓаните, таа повикува на фокус кон напредокот.

– Македонската држава, македонската политика, па и народот, треба да се фокусираат на реформите, за подобар живот, не за ЕУ, туку за самите граѓани. Извештајот носи позитивна порака и сакам да бидам оптимистична. Народот заслужува подобро, а тоа подобро е можно само ако продолжиме по европскиот пат – порача европратеничката со македонско потекло.

Во своето обраќање во Европскиот парламент, Јовева со емотивен и директен тон ги разби наративите дека „Европа го одзема македонскиот идентитет“:

– Знам дека боли, и мене лично ме боли, но не прифаќајте наративи од политичари кои ќе тврдат дека Европскиот парламент ви ги одзел идентитетот или јазикот. Тоа не е вистина – вели Јовева.

Таа им порача на оние кои шират такви тврдења дека „македонскиот јазик е автентичен, а нивните обиди се современа фикција“.

– Идентитет кој опстанал со векови нема да исчезне поради едно гласање или поради вашето лобирање. За да постои, на македонскиот народ не му треба ваша дозвола. А за да го признаете тоа, вам ви треба чесност, интегритет и храброст – заврши Јовева во Европскиот парламент.