Премиерот и претседател на ВМРО-ДПМНЕ, Христијан Мицкоски, ги оцени како „исклучително конструктивни“ разговорите со владините партнери и потенцијалните коалициски сојузници за заеднички настап на претстојните локални избори.
Според него, процесот се движи во позитивна насока, а официјализацијата се очекува по завршување на годишните одмори.
– Очекувам дека некаде по годишните одмори ќе имаме и официјално соопштение до јавноста. Во периодот помеѓу 5 и 15 август Владата ќе биде на годишен одмор. Анализите ќе продолжат во тој период, и разговорите ќе траат. Во втората половина на август очекувам да заврши целиот процес и да се официјализира коалицискиот настап – изјави Мицкоски.
Тој нагласи дека веќе се завршени разговорите со внатрешните коалициски партнери и дека следуваат финалните анализи со потенцијалните нови политички субјекти.
– Во меѓувреме, разговорите ги завршивме со нашата внатрешна коалиција, со потенцијалните политички партии и идни наши коалициони партнери. Сега правиме анализа, и очекувам таа тема да се затвори до првата половина на август – додаде премиерот.
Што се однесува до локалните избори, Мицкоски најави дека по завршувањето на анализите, ќе се објават и имињата на кандидатите за градоначалници кои ќе добијат поддршка од коалицијата. Потврди дека владините партнери ќе имаат свои советнички листи, но дека поддршката на кандидатите ќе биде заемна.
– Логично е во сите општини да се поддржуваме едни со други. Мислам дека тоа ќе биде позитивен процес кој ќе заврши во втората половина на август – рече Мицкоски.
