Ураганот Мелиса попладнево треба да ја погоди Јамајка, откако во текот на неколку дена прерасна од тропска бура во ураган од петта категорија – најсилната можна според скалата на Сафиир-Симпсон.
На почетокот на викендот, Мелиса сè уште беше тропска бура, но за помалку од 24 часа брзината на ветерот се зголеми на околу 225 километри на час. До вчера, бурата достигна петта категорија, придружена со предупредувања од метеоролозите дека последиците би можеле да бидат „катастрофални“ додека се приближува кон јужниот брег на Јамајка.
Моментално, ветровите на ураганот достигнуваат до 290 километри на час, но според најновите прогнози, се очекува да почне да губи од силата додека се движи кон Куба.
Според сателитските податоци на „Zoom Earth“, Мелиса треба да го погоди источниот брег на Куба во раните утрински часови утре, со брзина на ветерот од околу 225 километри на час. Метеоролозите предупредуваат дека, иако ураганот би можел делумно да ослаби, неговите последици врз инфраструктурата и населението може да бидат сериозни.
Во Јамајка веќе се активирани тимови за итна помош, а организацијата „World Central Kitchen“ (WCK) соопшти дека има тимови подготвени за интервенција и за снабдување со храна веднаш по минувањето на ураганот.
„Имаме тимови на терен, координираме со локални ресторани за да обезбедиме оброци за погодените семејства штом условите дозволат,“ соопштија од „WCK“.
Ова е вторпат како „WCK“ делува на Јамајка по ураган – минатата година организацијата беше присутна за време на ураганот Берил, кога, според нивните податоци, поделила повеќе од 43.000 оброци за погодените жители.
Властите ги повикуваат граѓаните на Јамајка да останат во домовите, да се обезбедат со залихи на вода и храна, и да ги следат официјалните инструкции додека ураганот не помине низ островот.
