Израелскиот премиер Бенјамин Нетанјаху се стреми кон проширување на воените операции и целосна окупација на Појасот Газа, објави израелскиот Канал 12, повикувајќи се на функционер во кабинетот на премиерот.
Се очекува Нетанјаху да се консултира со својот кабинет и со военото раководство во наредните денови за да добие поддршка за својот план, објавија медиумите. Новинскиот портал Вајнет њуз цитираше висок функционер, наводно близок до Нетанјаху, кој рекол:
– Коцката е фрлена, одиме кон целосна окупација на Појасот Газа.
Инструкции за продолжување на војната во Газа
Нетанјаху претходно вчера објави дека ќе издаде „инструкции“ оваа недела за продолжување на војната во Појасот Газа. Во видео порака, објавена во неделата, израелскиот премиер рече дека Хамас одбива да се согласи на договорено решение.
Напорите за обезбедување прекин на огнот и за ослободување на заложниците преку индиректни разговори меѓу Израел и Хамас траат со месеци без резултати. Израелските сили моментално контролираат околу 75% од Газа.
Израелските одбранбени сили (ИДФ) постојано се спротивставуваат на целосната окупација на Појасот Газа, предупредувајќи дека уривањето на сите тунели и бункери на Хамас може да трае со години, според весникот Тајмс оф Израел.
Воените лидери предупредија и дека офанзивата, насочена кон заземање на цела Газа, може да ги загрози животите на заложниците, за кои се плашат дека би можеле да бидат убиени штом ќе се приближат израелските трупи.
Според извештаите, Нетанјаху сега е подготвен да го прифати тој ризик.
– Ќе има активности во областите каде што се држат заложниците – рекол функционерот.
Досега, претежно крајно десничарските министри во владата на Нетанјаху повикуваа на целосна окупација на Појасот Газа.
Израел ја укинува вонредната состојба
Од друга страна, пак, израелските одбранбени сили (ИДФ) објавија дека ја укинуваат вонредната состојба што беше во сила од нападот на Хамас на 7 октомври 2023 година, што вклучуваше продолжување на службата на резервистите за 4 месеци.
Овој потег ќе доведе до намалување на бројот на воен персонал и намалување на бројот на редовни војници во наредните недели.
Одлуката за намалување на воениот персонал дојде кратко откако придружбата на премиерот Нетанјаху зазеде остра позиција против началникот на Генералштабот, Ејал Замир, сугерирајќи дека „ако не му се допаѓа окупацијата на Газа, треба да поднесе оставка“.
Бројот на војници ќе биде намален за една чета
Израелската армија (ИДФ) објави во соопштение на својот профил на Икс дека бројот на војници во редовните баталјони ќе биде намален за приближно една чета, додека десетици војници ќе бидат префрлени во резервни баталјони.
Исто така, од борците во специјалните и елитни единици повеќе нема да се бара да останат во армијата подолго од првично планираното, што претходно се бараше од нив.
ИДФ им ветија на резервистите намалување на оперативното оптоварување во наредните месеци, по повеќе од една година служба од почетокот на конфликтот.
Замир изјави дека овие промени се направени со цел да се подобри квалитетот на службата на борците и да се заштитат нивните права, земајќи го предвид нивниот придонес кон армијата и Државата Израел.
Армијата изјави дека спроведувањето на овие мерки ќе помогне во зачувувањето на оперативните способности на специјалните единици, како и во одржувањето на професионалното искуство на борците.
