Израелските одбранбени сили (ИДФ) ја нарекоа најновата акција против раководството на Хамас во Катар „Операција Врв на огнот“, иако претходно израелскиот Канал 12 објави дека името на операцијата било „Ден на пресуда“.
Според информации на Ал Џезира, повикувајќи се на висок функционер од Хамас, групата предводена од Халил ал-Хаја, која се наоѓала во Катар, успеала да преживее по воздушниот напад.
Спротивно на тоа, саудискиот канал Ал-Хадас извести дека во нападот загинале неколку високи функционери на Хамас, меѓу кои Халил ал-Хаја, Халед Машал, Захер Џабарин и Низар Авадала. Засега нема официјални потврди ниту од Хамас ниту од властите во Катар.
Висок катарски функционер остро го осуди израелскиот напад на територијата на земјата, нагласувајќи дека истиот се случил во момент кога Доха посредувала во разговори за новата американска понуда за ослободување на заложници, изработена од специјалниот пратеник на САД, Стив Виткоф.
– Хамас ја доби понудата преку нас минатата недела во Париз. Катарскиот премиер Мохамед Абдулахман Ал Тани се сретна со делегацијата на Хамас, која вчера пристигна од Турција во Доха за да ја разгледа понудата. Но, Израел повторно ги поткопа надежите за мир, продолжувајќи со војната – рече катарскиот функционер во изјава пренесена од Тајмс оф Израел.
Арапските медиуми јавуваат дека во моментот на нападот во зградата се наоѓале сите највисоки лидери на Хамас. Меѓу нив бил и лидерот во Газа, Халил ал-Хаја, како и Захер Џабарин – одговорен за организацијата на Западниот Брег, Мохамед Дарвиш, шеф на Шура советот на Хамас, и Халед Машал, лидерот на организацијата во странство.
