Израелската војска во петокот објави дека извршила воздушни напади врз две воени бази во централна Сирија, пренесоа странските новински агенции. Израелските сили нападнаа воени бази во Палмира и Тихас.
„Израелската армија нападна стратешки воени објекти кои останаа во сириските воени бази Тадмур и Т4“, соопшти армијата, додавајќи дека ќе продолжи да се труди да ја елиминира секоја закана за Израел и неговите граѓани, пренесува германската новинска агенција dpa.
Претходно, Сириската опсерваторија за човекови права со седиште во Велика Британија објави дека израелски воени авиони гаѓале воен аеродром во Палмира.
Од соборувањето на сирискиот претседател Башар ал Асад во декември минатата година, израелските сили систематски ги напаѓаат зградите и оружјето на поразената државна армија. За тоа време тие окупираа и дополнителни области во југозападна Сирија.
Израелскиот премиер Бенјамин Нетанјаху повика на демилитаризација на јужна Сирија и рече дека Израел нема да толерира присуство на силите на новите власти јужно од главниот град Дамаск.
Сириското Министерство за надворешни работи го обвини Израел дека води кампања против „стабилноста на земјата“. Поранешниот бунтовнички водач и сегашен привремен претседател на Сирија, Ахмед ал Шара, ги осуди израелските напади по преземањето на власта во декември, но додаде дека неговата земја е премногу исцрпена за нова војна.
