Италијанската влада во вторник усвои сеопфатен план за реновирање и проширување на затворите за справување со пренатрупаноста. Планот има за цел да го зголеми капацитетот на затворите за дополнителни 15.000 места и да го олесни префрлањето на затворениците со зависности во центри за лекување.
Планот на владата на премиерката Џорџија Мелони предвидува зголемување на капацитетот на затворите и центрите за малолетнички притвор за речиси 10.000 дополнителни места до 2027 година.
Се очекува да се добијат уште 5.000 места во текот на пет години преку мерки за надградба и реорганизација на постојните затвори, објави австриската новинска агенција АПА.
Планот од 758 милиони евра, исто така, предвидува алтернативи на затворот за затворениците кои се на крајот од своите казни, се однесувале добро и не биле осудени за особено опасни кривични дела. За оваа група ќе бидат воведени забрзани процедури за предвремено ослободување или сместување во терапевтски установи, особено во случаи на зависност од дрога.
Според APA, забрзаната постапка е предвидена и за затворениците кои имаат право на предвремено ослободување.
Лошите услови на затворениците привлекоа внимание во Италија по рекордниот број самоубиства минатата година и поплаките за високите летни температури во притворните центри кои не се климатизирани.
Според италијанското Министерство за правда, во земјата имало 62.986 затвореници во средината на јули, додека реалниот капацитет на затворите бил 47.289. Ова значи стапка на зафатеност од околу 133 проценти, една од најлошите во Европа, според Ројтерс.
