Иран воведува нов систем за премин низ Ормускиот теснец

Иран во последните денови почна да се движи кон „селективна блокада“ на Ормускиот теснец, дозволувајќи им на бродовите од одредени земји да поминат низ стратешкиот воден пат.

Лојдс Лист, поморска новинска и аналитичка служба, во среда објави дека неколку земји, вклучувајќи ги Индија, Пакистан, Ирак, Малезија и Кина, се во директни разговори со Техеран за пловење низ неговите територијални води во теснецот, објави Ал Џезира.

Иранскиот корпус на револуционерната гарда (ИРГК) наводно развива нов систем за верификација и регистрација, напиша Лојдс.

- Advertisement -

Најмалку девет бродови поминале низ коридорот кај иранскиот остров Ларак до среда, а еден танкер наводно платил околу 2 милиони долари за правото на премин, објави Лојдс.

Алекс Милс, експерт за меѓународна трговија и поморско право, изјави за Ал Џезира дека новиот систем за регистрација нуди краткорочно решение, но може да се соочи со пречки од осигурителниот сектор.

„Понудата на Иран да им дозволи на бродовите што пловат низ неговите води да застанат во иранските пристаништа и да ги пријават сите дестинации на товар е интересна. Тоа е спротивно на долгогодишната практика на „сигнализирање“ при влегување во иранските води и носи дополнителни безбедносни ризици за бродовите додека конфликтот продолжува“, рече Милс.

„Сè уште не сум убедена дека ова би овозможило нормално работење на бродовите поради осигурувањето, оперативната безбедност и постојните режими на санкции, но како што конфликтот продолжува, тоа би можело да стане прифатлив ризик за некои компании и бродови“, додаде таа.