Претседателот Доналд Трамп неодамна ставил вето на израелски план за ликвидација на врховниот лидер на Иран, ајатолахот Али Хаменеи, изјавиле двајца американски функционери за Ројтерс.
– Дали Иранците убиле Американец досега? Не. Сѐ додека не го сторат тоа, дури и не размислуваме за напад врз политичкото раководство – рекол наводно еден од изворите, висок функционер во американската администрација.
Запрашан за извештајот за време на директно интервју за „Фокс њуз“, израелскиот премиер Бенјамин Нетанјаху изјави дека тоа не е точно, пренесе Тајмс оф Израел.
– Има толку многу лажни извештаи за разговори што никогаш не се случиле – нема да навлегувам во тоа – рече Нетанјаху.
Советникот за национална безбедност на Израел, Цахи Ханегби, исто така го демантираше извештајот, нарекувајќи го „лажна вест од највисок ранг“.
Иран се обидува да го убие Нетанјаху?
Иранските балистички ракети денеска напаѓале и приватни објекти, меѓу кои и резиденцијата на Нетанјаху во Цезареја, како и електраната во Хадера, пренесе Глобал тајмс.
Попладнево Техеран лансираше нова серија ракети кон Израел, но според израелските медиуми, сите биле успешно пресретнати од системите за противвоздушна одбрана.
Армијата на Израел соопшти дека граѓаните може да ги напуштат засолништата низ целата држава, откако беа активирани сирени поради ракетен напад.
Конфликтот меѓу двете држави влезе во трет ден, откако Израел започна офанзива врз ирански цели со цел да ја уништи нуклеарната програма на Техеран. Како одговор, Иран возврати со ракетирање, а во нападите загинаа десетици луѓе од обете страни.
