Илјадници луѓе протестираа на улиците на Будимпешта во вторникот вечерта против неодамна донесениот закон за забрана на паради на гордоста, јавува француската новинска агенција АФП. Критичарите предупредуваат дека усвојувањето на законот е ограничување на основните права и дополнително скратување на правата на ЛГБТИК заедницата во оваа земја-членка на ЕУ.
Демонстрантите вееја унгарски знамиња и знамиња со виножито и носеа натписи на кои, меѓу другото, пишуваше „Доста е со лаги“ и „Долу Орбан! Сакаме демократија“. Според АФП, повеќе од 10.000 луѓе се собрале во центарот на главниот град на Унгарија.
Еден од организаторите на протестот, независниот пратеник Акос Хадхази, рече дека протестите нема да завршат додека законот не биде укинат. Тој го нарече законот техно-фашистички и рече дека е направен според слични закони во Кина и Русија.
Протестен собир е најавен и за петок пред унгарската амбасада во Љубљана. Организиран е од неколку невладини организации во Словенија, а има за цел да изрази солидарност со ЛГБТИК+ заедницата во Унгарија и да го привлече вниманието на потребата од заштита на основните права на слобода на говор и јавно собирање, соопшти денеска здружението Легебитра.
Критичарите предупредуваат дека ова е ограничување на основните права и дополнително скратување на правата на ЛГБТИК заедницата во оваа земја-членка на ЕУ. Организаторите на парадата на гордоста најавуваат дека на 28 јуни ќе одржат марш во Будимпешта и покрај забраната, која ќе биде 30-та по ред.
Според германската новинска агенција dpa, неколку членови на Европскиот парламент, исто така, најавија учество на парадата на гордоста, меѓу кои и копретседателот на групата за правата на ЛГБТ Марк Ангел и копретседателот на политичката група на Зелените Тери Рајнтке.
Неодамнешната промена на законодавството во Унгарија и нејзиното влијание врз основните права ќе биде тема и на една од попладневните дебати на Европскиот парламент на пленарната седница во Стразбур денеска.
Унгарската влада на премиерот Виктор Орбан, исто така, планира можност за привремено одземање на државјанството на некои лица со двојно државјанство, се вели во предлог-законот доставен до парламентот од член на владејачката партија Фидес. Некои сметаат дека предлогот е алатка за замолчување на владините критичари. Нацрт-законот предвидува дека повлекувањето на унгарското државјанство се однесува само на двојни државјани чие второ државјанство не е земја-членка на ЕУ, Швајцарија, Лихтенштајн, Норвешка или Исланд.
