Хутите од Јемен го нападнаа Израел

Ракета е истрелана денеска од Јемен кон Израел, првпат откако започна војната со Иран пред еден месец, соопшти израелската армија.

Армијата рано утринава на Телеграм информираше дека воздушната одбрана е активирана, а медиумите јавија дека ракетата е успешно пресретната без жртви и материјална штета.

На почетокот на војната, која почна со американско-израелски напади врз Иран на 28 февруари, проиранската шиитска милиција Хути изрази „целосна и непоколеблива солидарност“ со Техеран. Во последниот период растеа стравувањата дека исламистичката група од Јемен би можела да се вклучи во конфликтот.

- Advertisement -

Хутите и претходно повеќепати напаѓаа трговски бродови во Црвеното Море и во Аденскиот Залив.

Овие поморски патишта претставуваат клучна врска меѓу Средоземното Море и Индискиот Океан и се сметаат за едни од најважните трговски рути во светот.

Хутите утрово официјално објавија дека влегуваат во војната во поддршка на Иран и потврдија дека го нападнале Израел за прв пат од почетокот на конфликтот. Се заканија дека ќе нападнат американски бродови и воени бродови во Црвеното Море доколку Вашингтон продолжи да учествува во акции против Иран и неговите сојузници.

Групата соопшти дека испалила серија балистички ракети „насочени кон чувствителни израелски воени објекти“ како одговор на нападите во Иран, Либан, Ирак и на палестинските територии. Хутите велат дека нивните операции ќе продолжат сè додека не престане „агресијата“ на сите фронтови.

Ова соопштение доаѓа откако израелските сили (ИДФ) објавија дека пресретнале ракета од Јемен.

Претходно јеменските бунтовници најавија дека се подготвени воено да интервенираат доколку нови сојузници им се приклучат на САД и Израел во војната против Иран.

Воениот портпарол на Хутите, Јахја Сари, во телевизиско обраќање истакна дека нивна интервенција е можна и доколку Исламската Република биде нападната од водите на Црвеното Море.

– Подготвени сме за директна воена интервенција во случај на нов сојуз меѓу САД и Израел против Иран, непријателски операции против Иран или против која било муслиманска земја во регионот на Црвеното Море и продолжена ескалација против Исламската Република Иран – рече Сари во видео објавено вчера.

Хутите, заедно со либанскиот Хезболах, палестинскиот Хамас и проиранските вооружени групи во Ирак, се дел од неформална коалиција што Иран ја нарекува „Оска на отпорот“ против Израел.

Хутите, кои контролираат голем дел од Јемен, извршија бројни напади врз Израел и врз комерцијални бродови во Црвеното Море за време на војната меѓу Израел и Хамас во Појасот Газа од 2023 до 2025 година.

Нивните напади со балистички ракети и со беспилотни летала во голема мера го нарушија сообраќајот во стратешкиот морски премин, кој сега го користи особено Саудиска Арабија за извоз на нафта, избегнувајќи го Ормускиот Теснец каде што Техеран го блокира сообраќајот.