Хоспитализацијата го натера Франциск да се осигура во своите политики

Папата Франциск пред да биде хоспитализиран овој месец назначил близок човек да го надгледува идниот таен собир за негов наследник. Бриселски Политико анализира дека неодамнешната ситуација го загрижува 88-годишниот папа и го тера да побрза да „врзе крај со крај“.

Политико напиша дека папата го назначил кардиналот Џовани Батиста Ре како декан на Колеџот на кардинали. Деканот ги надгледува подготовките за изборот на нов папа и, иако Ре е престар самиот да учествува, тој ќе биде клучна фигура во дискусиите зад затворени врати. Целта е, пишува Политико, да се осигура процесот да се одвива според желбите на Франциск.

Италијанската премиера Џорџа Мелони денеска го посети папата велејќи дека тој е „внимателен и одговорен“ и со добра смисла за хумор. Сепак, некои медиуми пишуваат дека папата и луѓето околу него се загрижени за ситуацијата. Ватикан соопшто дека папата станал од кревет и јадел по мирната ноќ, еден ден откако тестовите потврдија дека има пневмонија во двете белодробни крила, покрај астматичен бронхитис.

- Advertisement -

На папата како млад човек му бил отстранет дел од едното белодробно крило.

„Дури и ако Франциск ја преживее својата последна болест, набљудувачите го гледаат ова како веројатна пресвртница бидејќи Франциск го префрла фокусот од напредок во реформите кон нивно затворање“, пишува Политико.

Уште повеќе, наследувањето на папата може да биде исполитизирано поради последната вербална препирка која папата ја имаше со  американскиот потпретседател Џеј Ди Венс во врска со планот за депортација на илегални мигранти на новата американска администрација. Ова се случи брзо пред да се влоши здравјето на Франциск.

Венс, католик, кој во јануари во објава на социјалните мрежи го бранеше планот, се повика концептот познат како „ордо аморис“, или „ред на љубовта“, за да сугерира дека католиците мора да им дадат приоритет на неимигрантите.

Папата тогаш му одговори дека „вистинскиот „ордо аморис“ што мора да се промовира (е) … со медитација за љубовта што гради братство отворено за сите, без исклучок“.

„Папското отфрлање предизвика гнев кај Белата куќа, зголемувајќи ја можноста за многу политизирана битка за наследување доколку Франциск почине“, се вели во статијата.

Во саботата, понтифот, исто така, го забрза својот невиден реформски потег за назначување на калуѓерка, сестра Рафаела Петрини, за следна и прва жена гувернер на Ватикан, најавувајќи дека мандатот на Петрини ќе започне на 1 март.

„Сепак, можеби ова беше и случајност: сегашниот гувернер, кардиналот Фернандо Вергез Алзага, тој ден ќе наполни 80 години, што го прави неподобен за оваа улога“, коментира бриселскиот медиум.

Во меѓувреме, „Дејли Мејл“ го цитираше швајцарскиот весник Блик кој тврди дека швајцарската гарда која го чува понтифот наводно веќе се подготвува за смртта на папата, дека чуварите се под ограничување на движењето и дека погребот веќе се вежба.