Хамас го проучува израелскиот предлог за прекин на огнот: „Нема да разговараме за оружје“

Палестинското движење Хамас во понеделникот објави дека го проучува последниот израелски предлог за прекин на огнот во Газа, кој го доби од Египет. Израел, според Хамас, предлага 45-дневен прекин на огнот во замена за ослободување на половина од преостанатите заложници. Одговор најавуваат по завршувањето на внатрешните консултации, но инсистираат на познатите услови.

Секој договор мора да вклучува траен прекин на огнот, целосно израелско повлекување од Газа, искрена размена на затвореници, сериозен пат кон реконструкција и крај на блокадата на Газа, наведува Хамас, пренесуваат странските новински агенции.Предлогот, добиен преку египетските посредници во преговорите, вклучува ослободување на половина од преостанатите заложници во првата недела од договорот, 45-дневен прекин на огнот и влез на хуманитарна помош во Газа, наведува движењето.

Според претставник на Хамас, Израел бара и разоружување на Хамас и другите вооружени групи во палестинската енклава со цел трајно да се стави крај на војната, што е неприфатливо за движењето. Ал Џезира објави, повикувајќи се на неименуван висок претставник на движењето, дека израелскиот предлог бил отфрлен токму поради ова барање. „Нема да разговараме за оружјето на Хамас“, изјави портпаролот за катарската телевизија.

- Advertisement -

Израел се уште не ја коментирал изјавата на Хамас, пренесува француската новинска агенција АФП.

Израел и палестинското исламистичко движење во моментов преговараат за нов прекин на огнот преку посредници, откако не успеаја напорите за продолжување на претходниот прекин на огнот. Во преговорите посредуваат Египет, Катар и САД.

На 18 март, Израел ги обнови воздушните напади врз Газа, со што дефинитивно го прекрши примирјето што беше во сила од средината на јануари.

Оттогаш, стотици илјади луѓе се повторно раселени, а Израел го блокира пристапот до хуманитарната помош од 2 март. На енклавата снемува резерви, гориво, вода и други основни работи, предупредија во понеделникот Обединетите нации, оценувајќи дека Газа е зафатена од најтешката хуманитарна криза од почетокот на војната.

Припадниците на Хамас зедоа 251 заложник во нападот на 7 октомври што ја предизвика војната. Во Појасот Газа се уште се држат 58 од нив, од кои 34 се верува дека се мртви.