Гувернерот Славески се сретна со претседателот на Стопанската комора

Монетарната политика, финансиската стабилност и пристапот до финансии за стопанството се дел од темите за кои денеска разговараа гувернерот Трајко Славески и претседателот на Стопанската комора на Северна Македонија, Бранко Азески.

На средбата, информира Народна банка, е нагласена важноста на постојаниот дијалог помеѓу носителите на економската политика и бизнис-заедницата, особено во контекст на актуелните светски и регионални економски предизвици.

Азески истакна дека Комората е подготвена за понатамошна активна соработка со Народната банка, изразувајќи поддршка за професионалноста и кредибилитетот што гувернерот Славески ги носи на оваа позиција.

- Advertisement -

Славески ја истакна заложбата на Народната банка за транспарентност, предвидливост и поддршка на стабилноста, како предуслов за одржлив раст. Тој упати благодарност за поддршката и изрази задоволство од иницијативите на Комората за продлабочување на комуникацијата со институциите од финансискиот сектор.

Средбата заврши во конструктивен дух, со договор за засилување на соработката преку редовни консултации и размена на анализи и мислења од заеднички интерес.