Водечките грчки синдикати од приватниот и јавниот сектор денеска повикаа на еднодневен генерален штрајк, барајќи повисоки плати поради зголемените животни трошоци, а општиот прекин на работата веќе од утрово почна да го парализира животот во Грција.
Штрајкот беше повикан од два чадор синдикати кои ги претставуваат вработените во приватниот и јавниот сектор – Генералната конфедерација на грчките работници (ГСЕЕ) и синдикатот на вработените во јавните служби АДЕДИ.
Главната причина е вртоглавото зголемување на трошоците за живот, како и стравот дека новите царини наметнати од САД дополнително ќе ја комплицираат состојбата на вработените.
„Зголемените трошоци за живот ги внесуваат платите на вработените, а владата не покажува никаква загриженост“, велат од синдикатот ГСЕЕ. Според синдикатот, голем дел од населението троши повеќе од 40 отсто од својот приход за кирија и греење, пренесе агенцијата АП.
Повикот за еднодневен прекин на работата се однесува на речиси сите активности, вклучително и јавниот превоз, воздушниот и поморскиот сообраќај, образованието и градската администрација, пишува грчкиот весник „Катимерини“.
Кон штрајкот се приклучија и контролорите на летање, кои иако беше предложено да им се забрани, судот во вторникот попладне пресуди дека и тие имаат право на штрајк.
Траектите останаа закотвени во пристаништата од утрото на 9 април, како и бродовите, бидејќи во прекинот на работата учествува и Панхеленската федерација на морепловци (ПНО).
Островите се отсечени од копното, а странските туристи се заробени на аеродромите, или воопшто не можеле да стигнат до своите дестинации во Грција.
Атинското метро и покачената урбана железница ќе работат со ограничени часови во текот на денот и по изменет распоред, главно линиите до меѓународниот аеродром во Атина, а некои станици ќе останат затворени. Како што е најавено, слично ќе функционира и јавниот превоз низ цела Грција.
Целосно ќе биде прекинат железничкиот сообраќај во земјава, вклучително и приградските линии.
Низ земјата се одржуваат демонстрации, а синдикатите повикаа на централни протести во Атина. На протест повика и Грчката Панхеленска федерација на вработени во угостителството и туризмот.
Синдикатите бараат корекции на колективните договори во сите сектори, зголемување на платите, повторно воведување на 13-та и 14-та плата и политички мерки кои ќе го ублажат инфлацискиот притисок врз населението и кризата со поволни станови.
Во Грција, кога беше принудена да побара меѓународна помош за да избега од тешката должничка криза, многу од правата што работниците можеа да ги стекнат преку колективни договори со работодавачите беа укинати.
Во последните години Грција успеа да излезе од тешка финансиска криза, а нејзината економија е во подем, но многу Грци тоа не го чувствуваат од прва рака.
Иако економскиот раст на Грција во меѓувреме е околу два отсто над европскиот просек, таа сепак е на последното место во Европската унија според реалната заработка и куповната моќ.
Владата е соочена со дилема како да ги зголеми платите и животниот стандард без повторно да ја подгрее инфлацијата.
