Најмалку двајца членови на екипажот се повредени, а уште двајца се водат како исчезнати откако товарен брод во сопственост на грчка компанија беше погоден во Црвеното Море, потврдија грчките власти и сопственикот на бродот.
Ова беше втор напад во Црвеното Море за помалку од 24 часа. Целта беше товарниот брод „Етернити Ц“ со либериско знаме, кој беше нападнат од поморски дронови и бродови покрај брегот на Ходеида, околу 50 наутички милји западно од главниот град на Јемен, Сана, кој е контролиран од бунтовниците Хути, кои се сојузници на Иран.
Ниту една група сè уште не ја презеде одговорноста за нападот.
„Бродот бил на пат кон Џеда, Саудиска Арабија, кога бил погоден. Екипажот се состои од 22 филипински државјани и тројца индиски вооружени стражари“, изјави претставник на грчката компанија „Космошип“ за „Политико“. Не е познато дали нападот е целосно завршен бидејќи комуникациите беа прекинати и не беше можно да се контактира екипажот, додаде тој.
Двајца високи грчки функционери го потврдија нападот и идентитетот на екипажот.
Нападот врз „Етернити Ц“ се случи неколку часа откако Хутите ја презедоа одговорноста за сличен напад врз друг брод во сопственост на грчка компанија, „Меџик Сис“, кој исто така пловел под либериско знаме. Товарниот брод беше потопен откако беше нападнат со беспилотни летала, ракети и рачни гранати, според Хутите. Екипажот го напушти бродот и беше спасен и однесен во Џибути.
Од почетокот на војната во Газа во октомври 2023 година, Хутите редовно напаѓаат израелски цели и меѓународен превоз во Црвеното Море, велејќи дека покажуваат солидарност со Палестинците.
Израелската војска рано наутро во понеделник соопшти дека за прв пат по речиси еден месец ги таргетирала јеменските пристаништа контролирани од Хутите.
