Граѓаните гаѓаа со јајца додека се бираше новиот градоначалник

Немири избија утринава пред градското собрание во Нови Сад за време на  седницата на која беше избран новиот градоначалник, Жарко Мичин. Граѓаните фрлаа со јајца кон полицајците, а советниците се обидоа да го пробијат кордонот пред влезот.

Претседателката на градското собрание на Нови Сад, Дина Вучиниќ, соопшти дека не се точни информациите дека на советниците од опозицијата им бил забранет влез во собранието, јавува Н1.

Зградата на собранието од рано утринава ја обезбедуваат голем број полицајци, кои граѓаните се обидуваат да ги потиснат и да го изразат своето противење на политиката на владејачката Српска напредна партија (СНС), која, според лидерите на опозицијата во Нови Сад, доведе до смрт на невини луѓе на железничката станица.

- Advertisement -

– Дојдовме да влеземе во зградата што ни припаѓа, не дојдовме да ја окупираме зградата, не сме вандали. Ова е наредба од Белград, овде седат луѓе кои им извикуваа „усташи“ на студентите и сега не ни дозволуваат на нас советниците да влеземе на седницата на собранието – изјави за Н1, советникот од опозициската Демократска партија, Вељко Крстоношиќ, објаснувајќи како дошло до инцидентот.

По половина час судири ситуацијата се смирила кога студентите и нивните професори застанале пред кордонот од голем број полицајци во опрема за разбивање бунт, јави новосадскиот портал 021. rs.

На граѓански протест поради изборот на новиот градоначалник на Нови Сад повика лидерот на опозицијата Миша Бачулов, а му се придружија и Обединетата новосадска опозиција, како и просветните работници, јави Н1 од местото на настанот.

Претходниот градоначалник Милан Ѓуриќ поднесе оставка поради уривање на настрешница на железничката станица при што загинаа 15 лица. Новиот градоначалник Жарко Мичин, во градското собрание им се заблагодари на Ѓуриќ и на граѓаните кои гласаа за владеачката СНС, Српската напредна партија. Тој рече дека Ѓуриќ домаќински го водел градот и дека на општинската сметка има „историски 11 милијарди динари“.