Украина би можела да стане членка на Европската Унија пред 2030 година, доколку продолжи со реформите со истата динамика и квалитет, изјави претседателката на Европската комисија Урсула фон дер Лајен на денешната прес-конференција по самитот во Киев по повод 3-годишнината од русјата инвазија.
Фон дер Лајен нагласи дека процесот на проширување на ЕУ се заснова на заслуги и дека пристапувањето мора да биде корисно и за земјата-кандидат и за Унијата.
Таа додаде дека Унијата избегнува да дава точни датуми за членство, за да не создаде нереални очекувања кај другите кандидатки.
– Украина добро напредува и ако продолжи со реформите со оваа брзина и квалитет, можно е да стане членка пред 2030 година – изјави Фон дер Лајен.
Посветеност на ЕУ кон Украина е и ќе остане непоколеблива, бидејќи не е во прашање само правото на Украина да постои како слободна нација, туку и иднината на нашиот европски континент, изјави таа претходно во обраќањето на заедничката седница на Колеџот на комесари и украинската Влада.
– Нашата порака е многу јасна. Ги поддржуваме сите дипломатски напори кои ве вклучуваат вас. Ги поддржуваме преговорите кои водат до праведен и траен мир. И ние ќе го поддржиме мировниот договор што ќе ги земе предвид вашите интерес – им порача Фон дер Лајен на украинските претставници.
Таа додаде дека во исто време подеднакво цврста останува и позицијата на ЕУ кон Москва и ќе продолжи засилувањето на притисокот врз Русија и нејзината воена машина.
– Ќе продолжиме да бараме Русија да одговора за многуте злосторства што ги направи. Нема да ја заборавиме Буча, никогаш нема да го заборавиме Мариупол и многу други злосторства. Украина може да смета на нас. И денес го имате мојот Колеџ овде во Киев со вас. Ќе разговараме за сите чекори што ги преземаме за да ја обликуваме нашата заедничка иднина – додаде Фон дер Лајен.
Според неа, не може да има траен мир без правда и затоа е важно да се постигне решавачки напредок во формирањето на Специјален трибунал за кривичното дело агресија против Украина, пред кој ќе одговара Русија.
Фон дер Лајен истакна дека во изминативе три години на војна, уништување и бесмислени човечки трагедии, Украина и целиот украински народ покажаа извонредна храброст и неверојатна издржливост.
– Го изразувам нашето најдлабоко и најискрено восхитување. Восхит за тоа како продолжувате да се спротивставувате на нападите на Русија, но и за сето она што го постигнавте во услови на оваа страшна војна и апсолутен хаос. Ние сме длабоко импресионирани од она што го давате со молскавична брзина и сите реформи што веќе ги поминавте, тешки реформи додека водите војна и сите напори што ги преземате за да се приклучите на нашата Унија. Ќе продолжиме да ве поддржуваме на тој пат кон членство во Европската Унија на секој можен начин – рече Фон дер Лајен.
Таа нагласи дека ЕК работи напорно заедно со Украина за отворање преговорите по кластерите во текот на првата половина на 2025 година, но и за обезбедување на пристап на украинските индустриски производи до единствениот европски пазар.
Фон дер Лајен најави и зајакнување на меѓусебната соработка во сферата на одбраната и одбранбената индустрија, зголемување на енергетска безбедност и поддршка на младите и образованието во Украина.
– Ова за што зборуваме е повеќе од човечки капитал. Ова е народот на Европа кој заедно ја обликува својата заедничка европска иднина – заклучи Фон дер Лајен во обраќањето.
