Европскиот Парламент денеска усвои резолуција со која ја осудува Русија за систематско фалсификување историски аргументи, за да ја оправда војната во Украина.
„Текстот усвоен од Парламентот ги отфрла историските тврдења на рускиот режим кои ја поткопуваат историјата и националниот идентитет на Украина како залудни обиди да се оправда нејзината нелегална војна“, соопшти Европскиот Парламент.
Резолуцијата, исто така, го осудува неуспехот на Русија да воспостави одговорност за советските злосторства. Се осудува Русија и за спречување на обидите да се спроведе историско истражување и да се одржат јавни дебати за овие прашања. Резолуцијата наведува дека таквите практики придонеле режимот во Москва да ги „оживее империјалистичките политики и да ја инструментализира историјата за свои криминални цели“.
Европратениците истакнаа дека посилните и подобро координирани напори на ЕУ и нејзините земји-членки за брзо спротивставување на руските дезинформации, манипулации и странското мешање се од суштинско значење за заштита на интегритетот на демократските процеси и за зајакнување на отпорноста на европските општества.
Резолуцијата, исто така, ја повикува ЕУ да ги прошири санкциите против руските медиуми кои спроведуваат кампањи за дезинформација кои ја поддржуваат руската агресивна војна против Украина. ЕУ треба да ја зголеми поддршката за забранетите независни руски медиуми, за да се овозможат различни гласови во медиумите на руски јазик.
За резолуцијата гласаа 480 пратеници, против беа 58, а воздржани 48 пратеници.
