Водачот на еквадорската банда Адолфо Масијас Виламар, познат по прекарот Фито, е екстрадиран во САД, каде што ќе се соочи со обвиненија за трговија со дрога и оружје.
Масијас беше повторно уапсен во јуни, речиси една година откако избега од затвор со максимална безбедност каде што отслужуваше 34-годишна казна за низа кривични дела, објавува Index.hr.
Како што изјави неговиот адвокат за Ројтерс, Фито денес ќе се појави пред федералниот суд во САД, каде што ќе се изјасни за невин по меѓународните обвиненија за трговија со дрога и оружје.
Тој е осомничен и за нарачување на атентатот врз претседателски кандидат во 2023 година.
Масијас беше водач на бандата Лос Чонерос, која има врски со моќни криминални организации од Мексико и Балканот.
Тој е осомничен и за нарачување на атентатот врз претседателскиот кандидат Фернандо Виљавиченсио во 2023 година.
Бандата Лос Чонерос е широко обвинета дека го претворила Еквадор од туристичка дестинација во една од земјите со највисока стапка на убиства во регионот.
Денес, повеќе од 70 проценти од светското производство на кокаин поминува низ еквадорските пристаништа. Земјата се наоѓа помеѓу Колумбија и Перу, двата најголеми извозници на кокаин во светот. Во јуни, полицијата го лоцираше Масијас во подземен бункер, како што го опишаа, под луксузна вила во градот Манта.
По апсењето, тој беше префрлен во затворот Ла Рока, објект со максимална безбедност. Во тоа време, еквадорскиот претседател Даниел Нобоа ги пофали безбедносните сили за неговото апсење и објави дека ќе биде екстрадиран во Соединетите Држави. Еквадорската национална затворска служба (SNAI) објави дека Масијас е изнесен од затвор вчера наутро и предаден на американските власти.
„Тој ќе се изјасни за невин“
„Масијас и јас ќе се појавиме утре пред федералниот суд во Бруклин, каде што тој ќе се изјасни за невин. После тоа, тој ќе биде задржан во затвор кој сè уште не е утврден“, изјави вчера за Ројтерс неговиот адвокат Алексеј Шант.
Еквадорците гласаа на референдум за да дозволат екстрадиција на своите граѓани, по иницијатива на претседателот Нобоа, кој најави решителна борба против растечката стапка на криминал.
Во март оваа година, Нобоа во интервју за Би-Би-Си изјави дека сака американската, европската и бразилската војска да му се придружат во борбата против криминалните банди.
