Експлозија во фабрика за огномет во Кина уби девет лица, а 26 се повредени

Експлозија во фабрика за огномет во централна Кина уби девет лица, а 26 се повредени, објавија денес државните медиуми, додавајќи дека спасувачките операции продолжуваат во тешки услови.

Катастрофата се случила кратко пред 8:30 часот наутро (2:30 часот по средноевропско време) во понеделник во индустриски комплекс во близина на Чангде, град во покраината Хунан, објави кинеското државно радио CNR.

Според најновиот биланс утрово, има девет мртви и 26 повредени, објави радиото, повикувајќи се на командниот центар на спасувачката служба.

- Advertisement -

Радиото соопшти дека спасувачките екипи се уште се на местото на настанот, опишувајќи ја „сложената“ ситуација бидејќи понатамошните експлозии би можеле да ја попречат нивната интервенција.Фабриката за огномет Шанжу се наоѓа во планинскиот дел од округот Линли, северно од градот Чангде во покраината Хунан. Ризикот од понатамошни експлозии и недостатокот на голем извор на вода во планинската област ја комплицираа работата на пожарникарите и потрагата по жртви, објави денес CCTV.

Кинеската новинска агенција Синхуа објави дека Министерството за управување со вонредни состојби испратило тим на местото на настанот за да ги надгледува спасувачките операции и повика на сите напори за брзо утврдување на причината за експлозијата и идентификување на одговорните.