Пријатели граѓани, подгответе се за најголемото откровение во историјата на европската економија! Според најновите изјави од ВМРО-ДПМНЕ, ние сме топ 5та економија во Европа. Да, вие правилно прочитавте – Северна Македонија, земјата каде што младите мигрираат како птици селици,каде сиромаштијата е добро утро, сега е меѓу економските гигантите на континентот.
Методологијата на чудото
Веројатно се прашувате како математички е можно земја со 2 милиони жители да се натпревари со Германија, Франција, Италија и Велика Британија. Одговорот е прост: ние сме откриле нова математика! Додека другите држави користат застарени методи како БДП по глава на жител, вкупен БДП, или продуктивност на работната сила, ние имаме револуционерен пристап – ги броиме само позитивните бројки.
Топ 5 – но во што?
Ако сме навистина топ 5 во Европа, тогаш логично се поставува прашањето: во што точно? Можеби сме топ 5 по:
- Креативност во статистичките интерпретации
- Брзина на миграција на млади кадри
- Број на ветувања по квадратен метар територија
- Оптимизам на политичарите наспроти реалноста
Мистеријата на останатите 45 држави
Ако ние сме топ 5, тогаш што се случува со останатите 45 европски држави? Дали Швајцарија, Норвешка, Данска и Холандија се соборени од нашиот економски цунами? Дали Луксембург и Ирска молат за совети од нашите економски стратези?
Пензиите од 7000 денари – глобален рекорд
Зголемување на пензиите до 7000 денари за 18 месеци е навистина импресивно достигнување. Со оваа сума, нашите пензионери можат да си дозволат луксуз како што е избирање дали да купат леб или млеко. Европските пензионери сигурно ни завидуваат на оваа економска моќ.
Растот од 3.2% – светски феномен
БДП растот од 3.2% е толку спектакуларен што веројатно ќе се изучува на економските факултети низ светот. Додека земји како Ирска или Полска се борат со двоцифрени раст, ние скромно со наши 3.2% ги оставаме во прашина.
Извозот на земјоделски производи – агроиндустриски бум
Зголемувањето на извозот на земјоделски производи за 50% е доказ дека сме станале агроиндустриска сила. Европа очајно чека на нашиот домат и краставици за да ја спаси својата економија.
Ребалансот поради зголемени приходи – фискален триумф
Фактот што ребалансот се прави поради зголемени приходи, а не поради дефицит, е револуционерен во европските стандарди. Други држави сигурно ќе копираат оваа генијална стратегија.
Епилог: Реалноста или паралелна димензија?
Можеби живееме во паралелна димензија каде што законите на економијата не важат. Или можеби некој навистина тера мајтап со граѓаните, надевајќи се дека ќе ги заборават сметките за струја, цените во продавниците и платите на крајот од месецот.
Едно е сигурно: ако сме навистина топ 5 економија во Европа, тогаш Европа има поголеми проблеми отколку што мислевме. Или можеби, само можеби, некој треба да го провери калкулаторот.
П.С. Ако некој од читателите живее во останатите 45 “помизерни” европски држави, ве молиме споделете ги вашите искуства за да можеме подобро да ја разбереме нашата економска супериорност.
Сашо Денесовски
