Дронови експлодирале на улици, жителите бегале по засолништа, следеле балистички ракети

Русија ја нападна украинската престолнина со бесна ракетна и дронска офанзива пред зори во четвртокот, при што загинаа најмалку 6 цивили, во напад што следеше откако претседателот Трамп ја предупреди Москва дека ќе воведе нови санкции доколку ваквото насилство продолжи, објави Њујорк тајмс.

Спасувачките екипи се тркаа до повеќе од дваесетина локации низ главниот град, Киев, за да ги изгаснат пожарите и да бараат преживеани под урнатините на уништените станбени згради.

Повредени се 52 луѓе, меѓу нив и 9 деца

„Имаме 52 повредени, од кои речиси 30 се хоспитализирани. Меѓу нив, повредени се и 9 деца“, изјави шефот на градската воена администрација, Тимур Ткаченко, во соопштение дадено во 7 часот наутро по локално време.

- Advertisement -

Едно дете е меѓу загинатите. Бројот на загинати и повредени најверојатно ќе расте, предупреди Ткаченко.

Нападот се случи веднаш откако претседателот Трамп го предупреди Путин дека ќе воведе нови санкции ако тој не стави крај на крвопролевањето во рок од 10 дена. Руските власти го отфрлија предупредувањето, а многумина во Киев го сфатија бомбардирањето како начин на Путин да им се потсмева на САД.

Роеви дронови влегле во Киев

Офанзивата започнала околу полноќ, кога роеви дронови, натоварени со експлозиви, навлегле во градот од повеќе правци.

Трасери од тешки митралези го осветлувале небото додека противвоздушната одбрана се борела да одговори на нападот. Дронови експлодирале над градските улици додека жителите трчале да најдат засолниште каде што ќе стигнат.

Во 3:20 часот наутро, Воздухопловните сили прогласиле прекин на опасноста, но заканата се вратила околу 4:30 часот.

Вториот бран напади бил со балистички ракети

Овој пат заканата доаѓала од балистички ракети. Небото се осветлило кога тие погодиле во центарот на градот, при што една удрила во деветкатна станбена зграда.

Според властите, најмалку 27 локации во Киев биле погодени – или со директен удар, или со паднато шрапнелско остатоци, главно во Солоњанскиот реон.

Претседателот Володимир Зеленски сподели видео на една станбена зграда претворена во урнатини. Тој напиша:

„Луѓе се под рушевините. Сите служби се на терен. Руските терористи“.

Русите го зазеле Часов Јар

Руските трупи ја презеле контролата врз градот Часов Јар во регионот Донецк, објави руското Министерство за одбрана.

„Како резултат на офанзивните операции во правец Краматорск-Дружковка, градот Часов Јар од Донецката Народна Република е ослободен“, се наведува во официјалното соопштение на Министерството.

Според руската страна, Часов Јар има значајно оперативно и стратешко значење, бидејќи отвора пат кон Славјанск и Краматорск, како и кон Константиновка – градови кои сè уште се под контрола на украинските сили.