Објавен е доверлив документ на Пентагон кој сугерира дека САД можеби нема да ѝ помогнат на Европа во случај на руски напад.
Тајниот меморандум на американскиот секретар за одбрана Пит Хегсет, наводно, има приоритет за одвраќање на амбициите на Кина околу Тајван и зајакнување на одбранбените мерки на американска територија, дознава Вашингтон пост.
Од меморандумот може да се прочита ставот на Хегсет дека Америка нема да ѝ понуди значителна поддршка на Европа, туку очекува членките на НАТО алијансата да ја преземат примарна улога во одбраната на нивната територија.
Насоките на документот, исто така, сугерираат дека САД ќе помогнат во нуклеарното одвраќање на Русија, но ќе распоредат сили кои не се клучни за домашната безбедност или за мисиите поврзани со Кина.
Документот од 9 страници нагласува дека е важно европските нации да го зголемат својот придонес во одбраната. „НАТО на тој начин ќе може сигурно да ја одврати или порази руската агресија дури и ако одвраќањето не успее, а САД се веќе вклучени или мора да одржуваат сили за одвраќање во друг регион“, се објаснува во меморандумот.
Меморандумот на Пентагон кореспондира со изјавите на американскиот претседател Доналд Трамп, кој нагласи дека американските сили мора да бидат подготвени да ги бранат американските интереси „секаде каде што би можеле да бидат загрозени, од Гренланд, преку Панамскиот канал до Кејп Хорн“.
Насоките потсетуваат на извештајот објавен минатата година од Фондацијата Херитиџ, конзервативен институт за истражување на јавната политика.
