Доларот во предност пред еврото и другите валути

Европските берзански индекси денеска се во голем пад откако американскиот претседател Доналд Трамп воведе трговски царини за неколку земји и се закани дека ќе го стори истото со Европската Унија и Велика Британија.

Индексот на Франкфуртската берза DAX во 9.30 часот падна на 21.340,02 поени, британскиот FTSE 100 на 8.567,25 поени, францускиот CAC 40 на 7.815,71 поени, а московскиот MOEX на 2.938,57 поени.

Вредноста на американскиот берзански индекс Dow Jones падна на 44.544,66 поени пред отворањето на берзите во САД денеска, индексот S&P 500 падна на 6.040,53 поени, а вредноста на Nasdaq индексот падна на 19.627,44 поени.

- Advertisement -

Според сегашните берзански податоци, цената на суровата нафта порасна на 74.254 долари, а на нафтата од типот брент на 76.752 долари.

Европските фјучерси на гас за март се тргуваа на отворањето на берзата ТТФ по цена од 54,395 евра за мегават-час.

Цената на златото порасна на 2.797,42 долари за унца, а на пченицата падна на 5,5477 долари за бушел (бушел е 27,216 кг).

Вредноста на еврото во однос на доларот на берзата Forex изнесува 1,02345, што е за 1,26 отсто помалку од петокот.

Доларот забележа силни добивки во однос на повеќето големи светски валути поради царините на Трамп.

Пазарите во регионот реагираа негативно на одлуката на претседателот Трамп во текот на викендот да воведе царини од 25% за увоз од Мексико и Канада и дополнителни 10% за стоки од Кина.

Тарифите за овие земји стапуваат на сила утре.

Канада возврати со сопствени санкции за увозот од САД, а Мексико се закани дека ќе го стори истото, пренесува CNBC.

Трамп, исто така, рече дека наскоро ќе воведе царини за стоки увезени во САД од Европската Унија и не ја исклучи таквата мерка против Велика Британија.

На прашањето на Би-Би-Си дали има краен рок за воведување тарифи за Европската Унија, Трамп рече дека нема временска рамка, но дека тоа ќе се случи „многу наскоро“.