Дезинфекциските средства се користат широко – сега ЕУ бара забрана поради канцерогеност

Дезинфекциските средства се користеа толку многу за време на пандемијата што имаше недостиг извесно време, а ЕУ сега размислува за трајна забрана за нив бидејќи клучната состојка, етанолот, може да го зголеми ризикот од рак.

Порано овој месец, здравствените претставници на ЕУ предложија забрана или замена на средствата за дезинфекција на раце што содржат алкохол поради загриженост за зголемен ризик од рак и компликации во бременоста, објави Ројтерс.

Дали средствата за дезинфекција се повлекуваат од полиците?

- Advertisement -

Доколку предлогот биде прифатен, тоа би можело да доведе до повлекување на средствата за дезинфекција на раце, детергентите и другите популарни средства за чистење што често се користат во болниците низ ЕУ, објави Tportal.

Експертите предупредуваат дека таквата одлука би можела да има огромно влијание врз болниците низ целиот континент и дека алтернативите на етанолот, како што е изопропанолот, се уште потоксични. Исто така, користењето сапун може да биде побавно и да ја оштети кожата.

Александра Питерс од Универзитетот во Женева и Мрежата за чисти болници изјави за Фајненшл тајмс:

„Влијанието врз болниците би било огромно. Инфекциите поврзани со здравствената заштита убиваат повеќе луѓе секоја година отколку маларијата, туберкулозата и СИДА-та заедно.“

Забрана – за или против?

Комитет на Европската агенција за хемикалии (ECHA) ќе се состане кон крајот на ноември за да одлучи дали етанолот треба да се класифицира како штетен. Доколку експертите на ECHA заклучат дека етанолот е канцероген, ќе препорача негова замена.

Сепак, етанолот сè уште може да биде одобрен за употреба како биоцид ако се смета за безбеден на очекуваните нивоа на изложеност или ако не се пронајдат алтернативи.

Голем број организации веќе се спротивставија на предложената забрана, велејќи дека нема доволно докази за да се поддржат тврдењата дека етанолот е штетен.

Никол Ваини, директорка за прашања поврзани со ЕУ во Меѓународното здружение за сапуни, детергенти и средства за чистење, рече дека нема студии кои конкретно го разгледуваат етанолот.

Здравствени ефекти на етанолот
Достапните податоци главно се однесуваат на здравствените ефекти на алкохолот преку консумирање алкохолни пијалоци. Иако етанолот може да ја исуши и иритира кожата, предизвикувајќи црвенило и оток, сериозните здравствени ефекти зависат од неколку фактори, вклучувајќи ја количината и времетраењето на изложеноста, како и контактот со други хемикалии.

Изложеноста на етанол преку вдишување може да предизвика иритација на носот и грлото, предизвикувајќи кашлање и задушување, а во високи концентрации може да предизвика интоксикација, но сè уште нема студии кои докажале долгорочна штета, особено ако производите се користат правилно.