Духовниот водач на тибетскиот будизам, Далај Лама, во својата нова книга изјави дека неговиот наследник ќе се роди надвор од Кина, продлабочувајќи го долгогодишниот спор со Пекинг за контролата на хималајскиот регион од кој побегна пред повеќе од шест децении.
Во книгата „Глас за безгласните“, која ќе биде објавена во вторник, 89-годишниот Далај Лама нагласува дека Тибетанците ширум светот сакаат институцијата Далај Лама да продолжи и по неговата смрт. Ова беше прв пат тој експлицитно да изјави дека неговиот наследник ќе се роди во „слободниот свет“, нешто што претходно само нејасно го сугерираше, посочувајќи дека може да се инкарнира надвор од Тибет, можеби во Индија каде што живее во егзил.
„Бидејќи целта на реинкарнацијата е да го продолжи делото на неговиот претходник, новиот Далај Лама ќе се роди во слободниот свет, така што традиционалната мисија на Далај Лама – да биде глас на универзалното сочувство, духовен водач на тибетскиот будизам и симбол на Тибет што ги отелотворува аспирациите на тибетскиот народ – може да продолжи“, напиша Лама.
Тензин Ѓацо, сегашниот 14-ти Далај Лама, побегна во Индија во 1959 година, на 23-годишна возраст, по неуспешниот бунт против комунистичкото владеење на Мао Це Тунг. Тој ја доби Нобеловата награда за мир во 1989 година за неговата борба за правата на Тибет.
Пекинг, сепак, го смета за сепаратист. Портпаролот на кинеското Министерство за надворешни работи ги отфрли неговите тврдења, велејќи дека Далај Лама „нема право да го претставува тибетскиот народ“. Кина инсистира дека ќе го избере неговиот наследник, додека Далај Лама вели дека наследникот назначен од Пекинг нема да биде легитимен или прифатен.
„Лосата на живиот Буда Далај Лама потекнува и се развива во кинески Тибет, а неговиот религиозен статус и титула беа одредени од централната кинеска влада“, изјави кинеската портпаролка Мао Нинг. „Самиот 14-ти Далај Лама беше признат во согласност со религиозните ритуали и историските конвенции, по што неговото наследување беше одобрено од тогашната централна влада“, пишува Ројтерс.
Оваа изјава покажува дека конфликтот меѓу Тибет и Кина за духовното наследство на Далај Лама ќе продолжи, со потенцијални далекусежни последици за иднината на тибетскиот будизам.
