Британец е погрешно ослободен од затвор истиот ден кога е осуден, но сам се врати во затворот по три дена кауција. Полицијата потврди дека Вилијам Смит (35), се предал вчера во затворот Вандсворт.
Англиските медиуми пишуваат дека Смит е ослободен од затвор во јужен Лондон во понеделник и покрај тоа што е осуден на 45 месеци затвор истиот ден во Крунскиот суд Кројдон за повеќекратни кривични дела измама. Тој е еден од двајцата затвореници кои погрешно беа ослободени од Вандсворт во одделни инциденти во изминатата недела.
Ослободувањето на Смит се должи на административна грешка во судот – условна казна е внесена во компјутерскиот систем наместо затворска казна. Иако е направена корекцијата, таа наводно е испратена на погрешно лице, што довело до неверојатна грешка. Откако Смит се предаде, полицијата во Сари го повлече апелот за помош за негово лоцирање.
Видео од неговото пристигнување во затворот стана вирално на социјалните мрежи.
За разлика од Смит, полицијата сè уште го бара Брахим Кадур-Шериф, алжирски сексуален престапник кој е погрешно ослободен на 29 октомври. Тој влезе во Велика Британија легално во 2019 година, но е во постапка за депортација. Метрополитенската полиција соопшти дека не е информирана за неговото ослободување до 4 ноември.
Министерката за правда во сенка, Алекс Дејвис-Џонс, изјави дека управниците на затворите биле повикани на итен состанок и дека се распоредени експерти за технологија за да помогнат во модернизацијата на „архаичните“ затворски системи базирани на хартија. Таа рече дека го дели „гневот и фрустрацијата“ на јавноста, нагласувајќи дека ситуацијата сигнализира „затвор и правосуден систем во криза“.
Најновите бројки покажуваат дека бројот на неправедно ослободени лица се зголемил повеќе од двојно до март 2025 година, достигнувајќи 262 случаи во споредба со 115 претходната година.
Според англиското Здружение на затворски службеници, просечно 22 затвореници биле погрешно ослободени секој месец.
