Бразилската влада денеска одобри приклучување на Бразил во групата земји извознички на нафта ОПЕК +, одговарајќи на официјалниот повик од 2023 година.
-Иако членките на ОПЕК +, кои не се членки на ОПЕК се согласуваат да соработуваат со земјите од ОПЕК, Бразил нема да има обврски како што се намалување на производството – изјави министерот за рударство и енергија Александре Силвеира.
Силвеира го нарече ОПЕК + само „форум за дискусија за стратегиите на земјите производители на нафта“.
– Не треба да се срамиме што сме производители на нафта. Бразил треба да расте, да се развива и да создава приходи и работни места – нагласи тој.
Групата ОПЕК + ги вклучува 12-те членки на групата ОПЕК основана за да го координира производството на нафта за стабилизирање на пазарот, плус 10 главни земји производители на нафта, од кои Русија е убедливо најголема.
