Еден маж бил прободен, а уште седум лица полесно повредени за време на вториот ден од фестивалот Сан Фермин во Памплона – настан кој традиционално привлекува илјадници луѓе што трчаат по тесните улички на средновековниот град заедно со бикови.
Најтешко повредениот, маж постар од 25 години, добил убод од биковски рог под десната пазува, изјави портпаролката на градските служби за итни случаи.
– Тој моментално е под надзор, но е во стабилна состојба – им рече таа на новинарите.
Седум други лица претрпеа полесни повреди на рамената или на главата.
На фестивалот, биковите се пуштаат на улиците, а потоа се тркаат до арената каде што се одржуваат борбите.
Стотици навивачи, многумина облечени во традиционални бели кошули со црвени шалови, трчаат со нив.
Еден од биковите застана на средина од трката утрово и ги бркаше тркачите неколку минути.
Фестивалот, кој стана меѓународно познат по романот на Ернест Хемингвеј од 1926 година „И сонцето изгрева“, трае една недела на почетокот на јули.
Учесниците повремено се прободени во стотиците вакви трки што се одржуваат во Шпанија секоја година. Други повреди се почести. Најмалку 16 тркачи ги загубиле животите на фестивалот во Памплона во текот на годините, последната во 2009 година.
Покрај утринските трки и попладневните борби со бикови, Сан Фермин , исто така, вклучува непрекината песна и танц. Се одржуваат и религиозни настани во чест на Свети Фермин.
