Без електрична енергија се 47.000 граѓани, 20 пожарникари се борат со огнот

Голем пожар денеска избувна во кругот на поранешната депонија Вардариште, поради што илјадници граѓани од Скопје останаа без електрична енергија, а густ чад со непријатна миризба се прошири кон неколку населби во источниот и југоисточниот дел од градот.

Од Центарот за управување со кризи – Скопје (РЦУК), информираат дека од околу 12:00 часот, екипи на Бригадата за противпожарна заштита (БППЗ) гасат запалена сува трева и отпаден материјал на поголема неутврдена површина во кругот на депонијата Вардариште. Во гаснењето моментално учествуваат седум противпожарни возила и најмалку дваесет пожарникари.

„Поради опасноста од зафаќање на трафостаници и електрични водови, струјата е превентивно исклучена, а поголемиот дел од Општина Аеродром е без електрична енергија“, соопштуваат од РЦУК.

- Advertisement -

Од Електродистрибуција информираа дека по барање на Противпожарната бригада, нивни екипи веднаш интервенирале на терен и ги исклучиле од напон трафостаниците „Скопје 4 – Аеродром” и „Скопје 4 – Исток”.

„Во моментов 47.000 корисници се без снабдување со електрична енергија“, соопштуваат од компанијата.

Без струја се жителите на Аеродром, Ново Лисиче, но и Маџари, Хиподром, Стајковци, Инџиково и Јурумлери. Напонот ќе биде повторно воспоставен веднаш по известување од Противпожарната бригада дека теренот е безбеден и дека пожарот е целосно изгаснат.

Во меѓувреме, жителите од околните населби пријавуваат силна и непријатна миризба од чадот, кој веќе влегува во домовите. Дел од граѓаните се пожалија и на отежнато дишење, особено повозрасни лица и деца.

– Не можеме ни прозорец да отвориме, чадот влезе во становите – реагираат жители од Ново Лисиче на социјалните мрежи.

Сите надлежни служби се ангажирани на терен, а граѓаните се повикуваат на трпение и претпазливост додека не се санира ситуацијата.