Белата куќа денеска претстави акциски план за промоција на развојот на вештачката интелигенција (ВИ) во САД, за извоз на американска вештачка интелигенција и за елиминирање на „идеолошката пристрасност“ на чет-ботовите.
– Претседателот Доналд Трамп посочи дека напредокот, па дури и доминацијата на САД во разузнавачката сфера е национален приоритет. Вклучени сме во глобална трка за лидерство во вештачката интелигенција и сакаме САД да победат – изјави Дејвид Сакс, виш советник на Белата куќа за вештачка интелигенција, за време на телефонски брифинг со новинарите.
Овој акциски план е резултат на широки консултации со експерти, истражувачи и со корисници, кои почнале во февруари.
Американскиот претседател има намера да отстапи од политиката на неговиот претходник Џозеф Бајден, кој се залагаше за контролиран раст, со акцент на безбедноста и на управувањето со ризиците.
Белата куќа соопшти дека идентификувала 90 мерки во 3 области кои ќе бидат спроведени „во наредните недели и месеци“.
Целта на првата област е да се олесни изградбата на нови дата-центри за работа на вештачката интелигенција и да се реализираат големи проекти за да се задоволат огромните потреби на тие центри за електрична енергија. Голем број дата центри веќе се во изградба во САД. Администрацијата на Трамп сака да го поедностави издавањето дозволи и овластувања за нови градилишта.
– За да се победи во оваа трка, (американските) модели на вештачка интелигенција мора да се користат ширум светот – вели Мајкл Крациос, директор за наука и технологија во Белата куќа.
Тој оцени дека американската вештачка интелигенција треба да биде референтен стандард во светот.
Трамп го направи приоритет ширењето на американската технологија во странство, особено на вештачката интелигенција. Тој придонесе за дискусиите што доведоа до тоа Обединетите Арапски Емирати во мај да потпишат договори со компаниите OpenAI, Oracle и Nvidia за изградба на сопствена инфраструктура за вештачка интелигенција.
Третата клучна насока на акциониот план е одговорот за она што Трамп го гледа како појава на генеративна ВИ со „идеолошка пристрасност“. Тој планира да им забрани на државните служби да купуваат софтвер за генеративна вештачка интелигенција кој покажува таква „пристрасност“.
Според Мајкл Крациос, со тоа би се „обезбедило овие системи да овозможат слобода на изразување“. Тој вели дека „главната идеолошка пристрасност“, според Белата куќа, се однесува на иницијативите кои промовираат застапеност и инклузија на малцинствата.
