Арктикот станува шаховска табла за САД и Русија

Нуклеарна подморница од класата „Ју Ес Њупорт Њуз“, првпат се закотви во Исланд, што испрати јасна порака за воената моќ и стратегија на САД во арктичкиот регион, пишува Бизнис инсајдер. Според американската команда во Европа и Африка потегот претставува одговор на засилените воени маневри на Русија на Арктикот и на Далечниот Север.

САД го сметаат Исланд за клучна точка во арктичката стратегија, особено поради неговата стратешка локација, која им овозможила на западните сили да следат советски и потоа руски подморници уште од времето на Студената војна.

– САД одржуваат поморска база тука со децении и се потпираат на Исланд за следење на операциите на советските, а потоа и руските подморници – појасни адмиралот Стјуарт Манш, командант на американската морнарица во Европа и Африка.

- Advertisement -

Ерин Сојер, в.д. амбасадорка на САД во Исланд, соопшти:

„Вашингтон и Рејкјавик одржуваат заедничка цел за ниски тензии на Арктикот, целосно свесни за напорите на Русија да го зголеми своето воено присуство во регионот“.

Американската подморница влегла во исландските води и лани, но сега за првпат се закотвила и екипажот се истоварил. Подморниците од оваа класа се познати по можноста да дејствуваат во кој било дел од светот.

Пентагон ја потенцира важноста на Исланд и во својата Арктичка стратегија за 2024 година, укажувајќи на конкуренцијата со Русија, но и на обидите на Кина да го прошири своето влијание на север.