Американскиот оскаровец Кевин Спејси се соочува со уште една тужба за сексуален напад во Велика Британија, бидејќи вчера против него беше поднесена граѓанска тужба пред Високиот суд во Лондон, нешто повеќе од 18 месеци откако беше ослободен од сите обвиненија во претходното кривично судење.
Според судските документи, случај се води и против лондонскиот театар „Олд Вик“, каде Кевин Спејси работи како уметнички директор од 2003 година, но детали за тужбата не се достапни.
Портпаролот на адвокатската канцеларија на тужителот потврди дека тужбата е поднесена. Спејси, кој се соочува со уште една тужба за сексуален напад во Лондон, не одговори на барањето за коментар, пренесува Ројтерс.
Спејси (65), кој доби Оскар за улогите во „Американска убавица“ и „Дежурни виновници“, беше една од најголемите холивудски ѕвезди пред да биде првпат обвинет за сексуален напад во 2017 година, по што беше отпуштен од серијата „Куќа од карти“.
Нему му беше судено во Лондон во 2023 година под обвинение за сексуално злоставување на четворица мажи во Велика Британија помеѓу 2004 и 2013 година, а беше ослободен на 26 јули 2023 година, на неговиот 64-ти роденден.
