Американскиот амбасадор во НАТО вели дека е клучно како ќе се брани Украина

Топ Вести - Слушај сега

Мирот во Украина е поблиску од кога било, но сè уште без прецизен датум за потпис. Американскиот амбасадор во НАТО, Метју Витакер, изјави дека постои реална можност мировниот договор да го потпишат Доналд Трамп и Володимир Зеленски, тогаш кога ќе биде вистинското време.

- Advertisement -

Изјавата беше дадена пред новинарите во Брисел. Витакер нагласи дека внимателно ги следи преговорите и дека сигналите се поохрабрувачки од било кога досега.

– Постојано го кажувам тоа, не само затоа што верувам во тоа, туку затоа што внимателно следам што се случува во преговорите. Мислам дека сме поблиску до мир во Украина од кога било – рече Витакер.

Тој дополни дека документите ќе бидат потпишани од Трамп и од Зеленски во момент кога условите ќе созреат и кога ќе постои целосна политичка подготвеност.

Американскиот амбасадор порача дека дипломатските напори не значат запирање на поддршката за Украина. Според него, земјата мора да продолжи да се брани додека траат разговорите.

– Верувам дека треба да продолжиме да се молиме за мир, но и да обезбедиме Украина да има сè што ѝ е потребно за одбрана, преку програмата „PURL“ и преку други иницијативи – изјави Витакер.

Програмата „PURL“ овозможува европските членки на НАТО да купуваат американско оружје за украинската армија, со координација од Вашингтон.

Соединетите Американски Држави очекуваат за два дена нови обврски од земјите членки на НАТО за дополнително вооружување на Украина. Витакер ги посочи Германија, Холандија и Норвешка како држави кои досега купиле најмногу американско оружје во рамките на „PURL“.

Генералниот секретар на НАТО, Марк Руте, за време на неодамнешната посета на Украина вети дека ќе бидат обезбедени повеќе од 15 милијарди американски долари за нови набавки на оружје за украинските вооружени сили.