Амбасадата на Шведска во Скопје отвори конкурс за позицијата „Амбасадорка на ден 2025/26“, на која може да се пријават девојки на возраст над 15 години, кои се грижат за родовата еднаквост, за еднакви можности за жените и девојките и кои сакаат да направат промена.
„Од кандидатката се очекува да го следи амбасадорот во текот на целиот ден, да присуствува на состаноци, да соработува со персоналот на Амбасадата и да учествува во целокупните дневни активности на Амбасадата. На крајот од работниот ден, ќе даде краток извештај за работата што ја завршил. Работа ќе започне во 08:30 часот и ќе заврши во 16:30 часот“, се наведува во соопштението на шведската Амбасада во земјава.
Сите заинтересирани кандидати треба да ги достават следните документи – кратко мотивациско писмо (најмногу 250 зборови) објаснувајќи зошто сте заинтересирани за позицијата; кратка биографија каде што посочувате што правите, кои се вашите интереси и кои активности сте ги презеле за да го промовирате или подобрите животот на заедницата во која живеете. Тоа може да биде акција во која сте иницирале или сте учествувале, која промовира еднаквост помеѓу девојчињата и момчињата, обезбедува помош за стари лица или загрозени лица, грижа за животната средина, итн.; Две препораки (најмногу 1-2 параграфи) од некој што добро ве познава и може да ве препорача за оваа позиција. Ова може да биде вашиот учител или наставник или секој што ве познава добро и ве видел во акција. Писмена согласност од вашите родители/ законски старатели (за девојчиња на возраст од 15-18 години)“, стои во повикот, појаснуваат од Амбасадата.
Крајниот рок за сите апликации 10 ноември до 23:59ч, а пријавувањето се прави преку е-пошта на: ambassaden.skopje@gov.se со наведување: Апликација за конкурсот #GirlsTakeOver за „Амбасадорка на еден ден 2025/26“.
Од Амбасадата додаваат дека информациите за резултатите од конкурсот ќе им бидат доделени на сите апликанти до крајот на ноември 2025 година, на е-поштата наведена во апликацијата. Успешната кандидатка ќе ги извршува своите должности како „Амбасадорка за еден ден“ на датум што заеднички ќе биде договорен.
„#GirlsTakeOver е глобална иницијатива, според која девојките ширум светот заземаат позиции на моќ по повод Меѓународниот ден на девојките, 11 октомври. Шведското Министерство за надворешни работи и многу шведски амбасади ширум светот учествуваат во иницијативата“, наведуваат од Амбасадата.
Повеќе информации може да се најдат на веб страницата на Амбасадата на Шведска: Vacancy Announcement: #GirlsTakeOver 2025/26: Ambassador for a Day – Sweden Abroad.
