Премиерите на Тајланд и на Камбоџа денеска треба да допатуваат во Малезија за мировни разговори во обид да се реши конфликтот околу долготрајниот граничен спор, јави ДПА.
Портпарол на тајландското Министерство за надворешни работи го потврди доаѓањето на делегациите, но не даде дополнителни детали.
Засега не е потврдено дали тајландскиот вршител на должност премиер Фумтам Вечајачај и камбоџанскиот премиер Хун Манет ќе се сретнат лично.
Воените сили на двете земји неодамна влегоа во судир поради граничниот спор, но причините за ескалацијата сè уште не се разјаснети.
Малезија оваа година претседава со Асоцијацијата на земјите од Југоисточна Азија (АСЕАН). Премиерот на Малезија, Ануар Ибрахим, веќе разговарал со лидерите на двете земји и понудил да посредува во решавањето на спорот.
Американскиот државен секретар Марко Рубио соопшти дека делегација од Стејт департментот се наоѓа во Малезија за да помогне во мировниот процес. Според соопштението, и претседателот Доналд Трамп и Рубио оствариле директни разговори со лидерите и со министрите за надворешни работи на двете земји.
– Сакаме овој конфликт да заврши што е можно побрзо. Американски претставници се тука за да го поддржат процесот на мир – изјави Рубио.
Трамп вчера изјави дека верува оти Тајланд и Камбоџа се подготвени да ги надминат разликите, откако им порачал дека САД нема да склучи трговски договори со нив доколку не ги прекинат судирите.
