Аеродромот во Вилнус бил блокиран со часови поради мистериозни балони натоварени со цигари кои ноќеска влегле од Белорусија во литванскиот воздушен простор

Аеродромот во Вилнус бил блокиран со часови поради мистериозни балони натоварени со цигари кои ноќеска влегле од Белорусија во литванскиот воздушен простор. Националниот центар за управување со кризи соопшти дека летовите се запрени, а една личност е уапсена.

Според литванската телевизија „ЛРТ“, околу 30 летови биле погодени од блокадата. Досега се пронајдени најмалку пет цилиндрични балони и околу 7.000 пакувања шверцувани цигари. Потрагата по останатите продолжува.

Притоа, властите укажале дека првичните наоди потврдуваат влегување на десетици вакви летечки шверцери од територијата на Белорусија.

- Advertisement -

На социјалните мрежи се споделува објавата од познатиот сајт за следење летвои Флајтрадар24, на кој може да се види како авионите во Литванија ги менуваат своите рути поради инцидентот со балоните.

Министерот за внатрешни работи на Литванија Владислав Кондратович изјави дека овие појави се дел од организиран криминал и дека владата ќе преземе координирани мерки со соседните земји за спречување на вакви инциденти.

Сличен случај имаше и на почетокот на октомври, кога повеќе од 20 балони натоварени со цигари го блокираа небото над Литванија. Властите тогаш најавија зголемено следење на воздушниот простор и повисоки казни за шверц преку дронови и балони.