Канје Вест сега тврди дека „не е нацист“, и покрај тоа што претходно овој месец предизвика гнев кај јавноста со тврдењето токму на спротивното

Контроверзниот рапер и дизајнер Канје Вест сега тврди дека „не е нацист“, и покрај тоа што претходно овој месец предизвика гнев кај јавноста со тврдењето токму на спротивното.

Раперот на почетокот на февруари на социјалната мрежа Икс (поранешен Твитер) изрази восхит кон Адолф Хитлер и јавно напиша: „ЈАС СУМ НАЦИСТ“. Освен тоа, на својата онлајн продавница почна да продава маици со свастики, подоцна тврдејќи дека со тоа заработил дури 40 милиони долари.

Сепак, Вест во меѓувреме ги избриша спорните објави и сега изгледа дека се повлекува од своите претходни изјави. Во објава на Икс во средата напиша: „По подетално размислување, сфатив дека не сум нацист“.

- Advertisement -

Сепак, многумина не се убедени дека Вест навистина ги променил своите ставови. Еден корисник на Икс напиша: „Канје Вест можеби е, а можеби и не е нацист, но очигледно очајнички бара внимание“. Друг коментираше: „Зошто едноставно да не го игнорираме овој кретен како што заслужува?“. Трет додаде: „Штетата веќе е направена“.

Профилот на Икс на Вест претходно беше деактивиран поради неговите антисемитски објави, но подоцна беше повторно вратен, со предупредување за „чувствителна содржина“ за корисниците кои се обидуваат да пристапат до страницата без најавен профил.

Предупредувањето гласи: „Внимание: Овој профил може да содржи потенцијално чувствителна содржина. Ова предупредување го гледате затоа што корисникот објавува потенцијално чувствителни слики или говор. Дали сакате да продолжите?“. Поголемиот дел од спорните објави на Вест беа избришани по неговото враќање на платформата, но не е јасно дали тој сам ги избришал или, пак, луѓето зад Икс.