Американскиот претседател Џо Бајден на синоќешната средба со украинскиот претседател Володимир Зеленски гарантирал дека САД ќе ја задржат силната поддршка за Украина во нејзината одбрана од Русија и покрај противењето на некои републикански претставници.
Средбата меѓу Бајден и Зеленски се одржа во Белата куќа, по што Бајден рече дека првите американски тенкови Абрамс ќе и бидат доставени на Украина следната недела. Тој, исто така, рече дека Вашингтон наскоро на Украина ќе и ја испрати втора батерија за противвоздушна одбрана „Хоук“ со придружната опрема.
Зеленски му се заблагодари на Бајден за новиот пакет воена помош од 325 милиони долари во оружје и противвоздушна одбрана, велејќи дека тоа е токму она што сега им треба на украинските војници. Украинскиот претседател рече дека тој и Бајден се договориле за конкретни чекори за проширување на извозот на жито од Украина соочени со руската блокада и тензиите со соседна Полска.
Барањето на Бајден за дополнителни средства од 24 милиони долари за Украина за да помогне во плаќањето на украинската одбранбена и хуманитарна помош до крајот на годината е закочена во буџетската битка со републиканските тврдокорни во Претставничкиот дом.
Бајден истакна дека единствен начин да се надмине противењето во Претставничкиот дом е да добие одобрение од американскиот Конгрес.
– Сметам на доброто расудување на Конгресот на САД. Нема алтернатива – рече Бајден.
Републиканскиот сенатор Ренд Пол, критичар на странската помош за Украина, изјави за „Фокс бизнис њуз“ дека Украина е „корумпиран режим“ и дека на војната не и се гледа крајот.
– Како што сме сега посветени да и помогнеме на Украина да се одбрани, исто така сме посветени да и помогнеме да се опорави и да се обнови во иднина, вклучително и поддршка на реформите кои ќе се борат против корупцијата – рече Бајден.
