Сијарто: Најважно е да се избегне директен конфликт меѓу Русија и НАТО
Унгарија смета дека најважно во овој момент е да не се дозволи тензијата во односите меѓу Русија и НАТО да се претвори во отворен воен конфликт, чии последици не се неопходни за ниту една страна, изјави шефот на унгарската дипломатија Петер Сијарто. .
Сијарто посочи дека ризикот тензијата во односите меѓу земјите на НАТО и Русија да се претвори во отворен конфликт нема да исчезне се додека трае кризата во Украина.
Тој смета дека Обединетите нации сè уште се најпогодното место за разговори за прашања поврзани со повторното воспоставување на мирот во различни делови на планетата.
Според него, кризата во Украина нема да се реши доколку не се постигне договор меѓу Русија и САД, без разлика дали тоа им одговара на другите земји.
„Навистина мислам дека без разговори и договори меѓу Русија и САД нема да биде можно да се реши оваа ситуација, сакале ние или не. Тоа е нашиот став. Можеби греши, но верувам дека е неопходен руско-американски дијалог за да се реши оваа ситуација што е можно поскоро“, изјави Сијарто за Спутник.
Истакнува дека, како и многу други членови од неговата генерација, претходно се надевал дека никогаш нема да ја доживее војната што ја преживеале неговите родители.
„Тоа очекување се покажа како илузија на крајот на февруари. Не сакаме да го загрозиме постоењето на планетата, бидејќи директниот конфликт меѓу НАТО и Русија нема крај и сите знаат што значи тоа. Затоа секогаш кога ќе се сретнеме со колегите од НАТО, нашата задача број еден е да не дозволиме конфликт меѓу Русија и НАТО“, рече Сијарто.
Коментирајќи ја можноста за испраќање сили на НАТО во Украина, Сијарто рече дека до сега договорите на земјите од НАТО овозможувале да се избегне распоредување на силите на Алијансата во Украина.
„Би сакале тие одлуки да останат во сила“, рече Сијарто.
