Немонтирано видео од нападот на Хамас на југот на Израел на 7 октомври беше прикажано денеска во Амбасадата на Израел во Белград.
Амбасадорот Јахел Вилан по тој повод им се обрати на присутните, меѓу кои имаше и дипломатски и медиумски претставници и рече дека главната причина за проекцијата е борбата против дезинформациите и спинот.
„На интернет кружат многу дезинформации и тешко е да се одвои вистината од фактите. А втората причина е што ова е историски момент, нешто што се случи во времето во кое живееме“, рече Вилан.
На видеата се прикажани злосторствата извршени од членовите на Хамас за време на нападите врз израелските цивили, вклучувајќи жени и деца, како и војници. Напредувањето низ територијата на Израел беше снимено, фотографирано или опишано од самите членови на Хамас на членовите на семејството или на воените команданти.
„Оваа идеологија под чија наредба беа извршени овие страшни злосторства сè уште постои. Она што Израел го прави сега во Газа не е чин на одмазда. Доколку дојде до прекин на огнот, за еден месец ќе има исти напади“, изјави Вилан.
На снимките од 7 октомври, безбедносните камери покажуваат убиства, палење, малтретирање деца, жени и мажи, како и упади во домови, случајни напади на улиците и напад на музичкиот фестивал Супер Нова. По враќањето од нападот, Палестинците во градот Газа ги пречекаа членовите на Хамас како победници и со прослава.
Многу странци загинаа или беа убиени, земени како заложници или исчезнаа во нападот на исламистичкото движење. Фестивалот Супернова во близина на Кибуц Реим во Израел беше едно од првите места што Хамас ги нападна на 7 октомври.
Во конфликтот, повеќе од 1.200 луѓе загинаа на израелска страна, а 240 беа земени како заложници од Хамас во Појасот Газа.
